FemInno կանանց միջազգային համաժողովի նախապատրաստական աշխատանքները ակտիվ փուլում են. հիմնադիրը կիսվել է մանրամասներով
6 րոպեի ընթերցում
ԵՐԵՎԱՆ, 27 ՀՈՒԼԻՍԻ, ԱՐՄԵՆՊՐԵՍ: Առաջին անգամ Հայաստանում անցկացվելիք FemInno կանանց նորարարական միջազգային համաժողովի նախապատրաստական աշխատանքները ակտիվ փուլում են: Համաժողովը անց է կացվելու հուլիսի 30-31-ը Կարեն Դեմիրճյանի անվան մարզահամերգային համալիրում:
«Արմենպրես»-ը կազմակերպիչների հետ մասնակցեց նախապատրաստական աշխատանքներին և զրուցեց համաժողովի հիմնադիր Սեդա Պապոյանի հետ, ով շեշտեց՝ սա Հայաստանում երբևէ կազմակերպված ամենամեծ համաժողովն է, որի կենտրոնական թեման կանանց ներգրավումն է տեղեկատվական տեխնոլոգիաների ու նորարարության ոլորտներում: «Սա կոնֆերանս է կանանց շուրջ, բայց ոչ միայն կանանց համար»,- ասաց Պապոյանը:
Նա պատմեց, որ որպես Girl in Tech միջազգային ցանցի հայաստանյան մասնաճյուղ՝ գործունեություն են ծավալում արդեն շուրջ 5 տարի՝ նպատակ ունենալով ներգրավել, կրթել և խրախուսել կանանց ներգրավումը տեխնոլոգիաների ոլորտում: Համաժողովը որոշել են անցկացնել դեռ 2020 թվականին: Հավատացել են, որ Հայաստանը կարող է իր վրա վերցնել տարածաշրջանային տեխնոլոգիական հանգույց լինելու բավական կարևոր պատասխանատվությունը՝ նաև կանանց մասնակցության և խրախուսելու տեսանկյունից:
«Կոնֆերանսը նվիրված է կանանց՝ գիտության, տեխնոլոգիաների և բիզնեսի ոլորտներում ներգրավմանը, խրախուսմանը և առաջխաղացմանը: Այստեղ շատ կարևոր է տղամարկանց դերը ևս, որովհետև գիտության և տեխնոլոգիաների ոլորտում գերակշռում են տղամարդիկ և իրենք են որոշում կայացնողները: Հաճախ հենց այդ որոշում կայացնողները պետք է փոխեն իրենց մոտեցումները, որպեսզի կանայք խնդիրներ չունենան»,- ընդգծեց Պապոյանը:
Նրա համոզմամբ՝ տվյալ ոլորտներում կանայք ստիպված են լինում նախ ապացուցել, որ իրենք ունեն բավարար կարողություններ, և միայն հետո նրանց հնարավորություն է ընձեռնվում արդյունք ստեղծել: Ինչո՞ւ ջանք ու ժամանակ վատնել միայն սեռով պայմանավորված խտրականության վրա՝ ընդգծում է Պապոյանը: Պետք է ընկալել մարդուն որպես մասնագետ և աշխատանքի մեկնարկը տալ հենց այդ կետից:
«Կոնֆերանսը եկել է ցույց տալու, որ կանայք ոլորտում ապացուցելու ոչ մի բան չունեն»,- նշում է կոնֆերանսի հիմնադիրը՝ ընդգծելով, որ համաժողովը կրում է Female is now (թարգմ. - «Կանանց ժամանակը հիմա է») խորագիրը:
«Մենք փորձում ենք հաստատել, որ ոչ թե ապագան է կանանցը, այլ կանանց ժամանակը հիմա է, ներկան կանանցն է»,- նշեց նա:
Պապոյանը հայտնեց, որ համաժողովին բացման ելույթով հանդես է գալու ԱԺ փոխխոսնակ Հակոբ Արշակյանը՝ ի աջակցություն գաղափարի և այն ջանքերի, որոնք գործադրվել են կոնֆերանսի կայացման գործում:
Կոնֆերանսին մասնակցող՝ ավելի քան 15 երկիր ներկայացնող շուրջ երեք տասնյակ բանախոսների շարքում թե՛ կանայք են, թե՛ տղամարդիկ: Պապոյանն ընդգծում է՝ լինելու են տղամարդ խոսնակների կողմից համարձակ ելույթներ այն մասին, որ տղամարդիկ են սխալ այս խտրականությունը ստեղծելու ճանապարհին:
Համաժողովի ընթացքում կամփոփվեն ինչպես Հայաստանի, այնպես էլ օտարերկրյա կանանց ու աղջիկների ստեղծած ստարտափների մրցույթի արդյունքները։ Ստացվել են ավելի քան 50 հայտ: Ունեն մասնագիտական ժյուրի, որը կորոշի ընտրված տասնյակի լավագույն ստարտափին կամ ստարտափներին: Իսկ մրցանակային ֆոնդը 10 հազար դոլարի սահմաններում է: 10 ստարտափներից հինգը Հայաստանից է, երկուսը՝ Հորդանանից, մեկը՝ Բահրեյնից, մյուսները՝ Տանզանիայից և Քենիայից:
Համաժողովին պետք է ելույթ ունենար նաև 2022 թվականի ապրիլին դժբախտ պատահարի հետևանքով զոհված Սոնա Մնացականյանը: Համաժողովի կազմակերպիչները որոշել են հենց նրա անունով կոչել FemInno-ի կրթաթոշակային ծրագիրը: Պապոյանը նշում է՝ Սոնան ոլորտում բավականին լուրջ հաջողությունների հասած կին էր, ում ելույթը, վստահաբար, շատերին կոգևորեր:
Կրթաթոշակ կտրամադրվի 3 հիմնական ուղղություններով՝ վերականգնվող էներգիա, տեխնոլոգիա և գիտություն: Կրթաթոշակի ֆոնդը հավաքվում է «ռեԱրմենիա» հարթակում: Ֆոնդի սահմանաչափը նախատեսվում է 50 հազար դոլար, հանգանակություններ հնարավոր է անել մինչև հուլիսի 30-ը՝ հետևյալ հարթակում:
«Ստացել ենք 40 հայտ: Կրթաթոշակները տրվելու են Հայաստանը և Արցախը ներկայացնող՝ 18 և բարձր տարիքի տասը աղջիկների և կանանց, որոնք բավական հիմքեր ունեն աջակցություն ստանալու համար»,- նշեց Պապոյանը:
Հուլիսի 30-ի երեկոյան կկայանա մրցանակաբաշխությունը, Սոնայի ամուսինը` Աշոտ Վարդանյանը, հանդես կգա ելույթով և կհայտարարի կրթաթոշակային ծրագրի բացումը: Մրցանակները կհանձնի Սոնայի մայրիկը:
FemInno համաժողովը լինելու է շարունակական: Ամեն տարի ամռանը կազմակերպիչները գնահատելու, արժևորելու են կանանց դերը տեխնոլոգիաների, գիտության մեջ: FemInno-ի հիմնադիրը շեշտում է՝ սա համերաշխության կոնֆերանս է, ուզում են սեռերի միջև հետաքրքիր համագործակցային մթնոլորտ ստեղծել, որոշում կայացնողերին ցույց տալ, որ կանայք իսկապես կարողանում են արժեքներ ստեղծել և պետք չէ նրանց նկատմամբ խտրական լինել:
Կարինե Տերտերյան