Տիգրան Մկրտչյանն ու Պանայոտիս Պիկրամենոսը վերահաստատել են Հայաստան-Հունաստան բարեկամական հարաբերություններն էլ ավելի խորացնելու պատրաստակամությունը
1 րոպեի ընթերցում
ԵՐԵՎԱՆ, 4 ՄԱՅԻՍԻ, ԱՐՄԵՆՊՐԵՍ: Հունաստանում Հայաստանի դեսպան Տիգրան Մկրտչյանը մայիսի 4-ին հանդիպել է Հունաստանի կառավարության փոխվարչապետ Պանայոտիս Պիկրամենոսին:
Ինչպես «Արմենպրես»-ը տեղեկանում է Հունաստանում ՀՀ դեսպանության տարածած հաղորդագրությունից, հանդիպման ընթացքում վերահաստատվել են Հայաստան-Հունաստան բարեկամական հարաբերություններն էլ ավելի խորացնելու պատրաստակամությունը, ինչի համար առիթ կծառայեն բարձր մակարդակով երկկողմ այցելությունները:
Դեսպան Մկրտչյանը խորին երախտագիտություն է հայտնել Հունաստանի կառավարությանն, երկրի վարչապետ Կիրիակոս Միցոտակիսին` Հայոց Ցեղասպանության անմեղ զոհերի հիշատակը վառ պահելու և ապրիլի 24-ին ոգեկոչելու համար:
Քննարկվել են երկկողմ առևտրատնտեսական հարաբերությունները զարգացնելու հեռանկարային քայլերը, այդ թվում առաջիկայում հայկական արտադրանքները Հունաստանի տարբեր քաղաքներում ներկայացնելու ծրագրերը:
Դեսպան Մկրտչյանը ներկայացրել է տարածաշրջանային վերջին զարգացումները՝ գլոբալ անվտանգությանը սպառնացող տենդենցների համատեքստում: