2 րոպեի ընթերցում
ԳՅՈՒՄՐԻ, 25 ԱՊՐԻԼԻ, ԱՐՄԵՆՊՐԵՍ: Ապրիլի 25-ին պաշտոնական այցով Գյումրիում էր Նորվեգիայի թագավորության Կրագերո քաղաքի պատվիրակությունը։ Գյումրու համայնքապետարանում Կրագերոյի քաղաքապետ Գռունե Վեգար Քնյուդսենը ու Գյումրիի քաղաքապետի առաջին տեղակալ Արթուր Պապիկյանը կնքեցին հուշագիր, ըստ որի Գյումրին և Կրագերոն հռչակվեցին քույր քաղաքներ:
Ինչպես տեղեկացնում է «Արմենպրես»-ը, քույր քաղաքներ ճանաչելու մասին որոշումը մշակվել էր դեռ 2018 թվականին՝ Գյումրու նախկին քաղաքապետ Սամվել Բալասանյանի ու Կրագերոյի քաղաքապետ Յոնե Բլիկրայի նախաձեռնությամբ:
«Որպես քույր քաղաքներ՝ առաջին համագործակցությունը կլինի մշակութային ու կրթական ոլորտներում, բայց հետագայում նաև բիզնես համագործակցություն ենք նախատեսում: Սպասվում է բավական լավ համագործակցություն»,- «Արմենպրես»-ի հետ զրույցի ընթացքում նշեց Գռունե Քնյուդսենը: Նա տեղեկացրեց, որ Կրագերո քաղաքում հիմա մեկ հայ ընտանիքի է ապրում:
«Սա իմ առաջին այցն է Հայաստան, հուսամ հաջորդ տարվա ընտրություններից հետո ևս բախտ կունենամ գալ Հայաստան, մի երկիր, որն ինձ զարմացրեց իր պատմական ու մշակութային հարուստ ժառանգությունով: Իրապես, շատ դրական լիցքեր ստացա Հայաստանից. զարմացած եմ մարդկանց վերաբերմունքից՝ շատ բաց ու ջերմ ժողովուրդ եք: Ուրախ ու հպարտ եմ , որ ստորագրեցինք երկու քաղաքների միջև հուշագիրը՝ ի նպաստ 2 քաղաքների զարգացման »,-նշեց նա:
Արթուր Պապիկյանն էլ իր խոսքում նշեց, որ այս պայմանագրով ամրագրվում է հետագա համագործակցությունն անչափ կարևոր ոլորտներում, ինչպիսիք են մշակույթը, կրթությունն ու բիզնեսը:
Լիահույս եմ, որ համագործակցային հարթակներում կունենանք արդյունավետ աշխատանք՝ ի շահ մեր երկու քաղաքների »,- եզրափակեց Գյումրիի փոխքաղաքապետը: