Հայ-ղազախական հարաբերությունները զարգացման զգալի ներուժ ունեն. Դեսպան Բոլատ Իմանբաև
3 րոպեի ընթերցում
![Հայ-ղազախական հարաբերությունները զարգացման զգալի ներուժ ունեն. Դեսպան Բոլատ Իմանբաև](http://armenpress.am/resized/480/static/news/b/2022/04/1079956.jpg)
ԵՐԵՎԱՆ, 6 ԱՊՐԻԼԻ, ԱՐՄԵՆՊՐԵՍ:Հայաստանի և Ղազախստանի հարաբերությունները հետագա զարգացման զգալի ներուժ և հեռանկարներ ունեն, «Արմենպրես»-ի հաղորդմամբ՝ Եվրասիական տնտեսական միության նոր մարտահրավերներին և հեռանկարներին նվիրված կլոր սեղանի ընթացքում հայտարարեց Հայաստանում Ղազախստանի Հանրապետության արտակարգ և լիազոր դեսպան Բոլատ Իմանբաևը՝ շնորհավորելով Հայաստանի Հանրապետության և Ղազախստանի Հանրապետության միջև դիվանագիտական հարաբերությունների հաստատման 30-րդ տարեդարձի կապակցությամբ, որը լրանում է այս տարի:
«Այն, ինչ սկսվեց արարողակարգային, դիվանագիտական գործողությունից՝ բանավոր նոտաների փոխանակությունից, այժմ վերածվել է բազմակողմանի, կենդանի, աշխույժ և ինտենսիվ հարաբերությունների և փոխգործակցության: Համոզված եմ, որ բարեկամական և փոխշահավետ ղազախա-հայկական հարաբերությունները կշարունակեն խորանալ ի շահս մեր ժողովուրդների, մեր պետությունների և ընդհանուր առմամբ՝ Եվրասիական տնտեսական միության», - հայտարարեց Ղազախստանի դեսպանը:
Բոլատ Իմանբաևի խոսքով՝ հայ-ղազախական հարաբերությունները հիմնված են բարեկամության և փոխըմբռնման ավանդույթների վրա, իսկ երկու պետությունների միջև ձևավորված իրավապայմանագրային դաշտը թույլ է տալիս կարգավորելու երկկողմ և բազմակողմ համագործակցությունը բոլոր ուղղություններով:
«Ընդ որում, ղազախա-հայկական հարաբերությունները հետագա զարգացման զգալի ներուժ և հեռանկարներ ունեն, այդ թվում՝ եվրասիական ինտեգրացիոն տարածությունում», - հավելեց դեսպան Իմանբաևը:
«Ինտեգրացիա և զարգացում» հետազոտության և վերլուծության հասարակական կազմակերպությունը և Եվրասիական փորձագիտական ակումբը այսօր՝ ապրիլի 6-ին, կազմակերպել էին «ԵԱՏՄ զարգացման հնարավորությունները և հեռանկարները հավաքական Արևմուտքի կողմից Ռուսաստանին տնտեսական պատերազմ հայտարարելուց հետո» թեմայով կլոր սեղան: Քննարկմանը մասնակցում էին Հայաստանում ՌԴ դեսպան Սերգեյ Կոպիրկինը, Հայաստանում Ղազախստանի դեսպան Բոլատ Իմանբաևը, եվրասիական այլ գործընկեր պետությունների դիվանագիտական ներկայացուցիչներ, ԵԱՏՄ կառույցների բարձրաստիճան պաշտոնյաներ, հայաստանցի և ռուսաստանցի հեղինակավոր փորձագետներ:
Արամ Սարգսյան