Գեղարքունիքում հրաձգության մարզային մրցաշարի հաղթող է ճանաչվել Մարտունու ավագ դպրոցի թիմը

ԳԱՎԱՌ, 4 ԱՊՐԻԼԻ, ԱՐՄԵՆՊՐԵՍ։ Գավառի Ավ. Իսահակյանի անվան N3 հիմնական դպրոցում տեղի ունեցավ հրաձգության մրցաշարի մարզային փուլը:

Ինչպես «Արմենպրես»-ին տեղեկացրին Գեղարքունիքի մարզպետարանի ԿՄՍ վարչությունից, այն կազմակերպվել էր ՀՀ մարզերի, Երեւան քաղաքի եւ Արցախի Հանրապետության հանրակրթական դպրոցների 7-12-րդ դասարանների աշակերտների միջեւ անցկացվող Սպարտակիադա մարզական միջոցառման ծրագրի շրջանակում:

Գեղարքունիքի մարզում հրաձգության մարզային մրցաշարն անցկացվեց երկու փուլով` համայնքային և մարզային: Համայնքային փուլն անցկացվել էր մարտի 17-18-ին` տարածքների ավագ զինղեկների կողմից: Համայնքայի փուլում հաղթած թիմերն էլ մասնակցեցին մարզային փուլին: Հրաձգության մրցումներին մասնակցած դպրոցների թիմերի կազմում ընդգրկված էին 4 տղա և 4 աղջիկ: Մրցումներն անցկացվեցին օդամղիչ հրացանով ` մինչեւ թիրախ 10 մետր հեռավորությամբ: Յուրաքանչյուր մասնակից իրավունք ուներ 8 կրակոցի, որից լավագույն 5-ը հաշվարկային էր: Թիմի հավաքած միավորը որոշվում էր թիմի յուրաքանչյուր անդամի հավաքած միավորների հանրահաշվական հանրագումարուվ: Հետաքրքիր եւ լարված մրցապայքարում հաղթող է ճանաչվել Մարտունու ավագ դպրոցի թիմը, երկրորդ տեղը զբաղեցրել է Գավառի ավագ դպրոցի թիմը, իսկ երրորդ հորիզոնականը՝ Սեւանի Մեսրոպ Մաշտոցի անվան N 1 հիմնական դպրոցի թիմը: Տղաների մրցապայքարում առաջինն է եղել Գավառի ավագ դպրոցի աշակերտ Սուրեն Շանոյանը՝ 45 միավորով, երկրորդ եւ երրորդ տեղերը կիսել են Մարտունու ավագ դպոցի աշակերտ Արամ Թաթոյանը եւ Գավառի ավագ դպրոցի աշակերտ Արամ Նիկողոսյանը՝ 42 միավորով: Աղջիկների մրցապայքարում առաջին հորիզոնականում է եղել Մարտունու ավագ դպոցի աշակերտուհի Նաիրա Խաչատրյանը՝ 44 միավորով, երկրորդում` Այգուտ գյուղի միջնակարգ դպրոցի աշակերտուհի Սուսաննա Հակոբյանը՝ 41 միավորով, իսկ երրորդում` Գավառի ավագ դպրոցի աշակերտուհի Ելենա Հովհաննիսյանը:

Ապրիլի 19-ին կայանալիք հրաձգության մրցաշարի եզրափակիչ փուլում ՀՀ Գեղարքունիքի մարզը կներկայացնեն Մարտունու ավագ դպրոցի հրաձիգները:

Խոսրով Խլղաթյան