1 րոպեի ընթերցում
ԵՐԵՎԱՆ, 16 ՓԵՏՐՎԱՐԻ, ԱՐՄԵՆՊՐԵՍ: ՀՀ Ազգային ժողովի «Հայաստան» խմբակցությունը որոշում է կայացրել վերականգնել իր մասնակցությունը միջազգային կազմակերպությունների աշխատանքներին։ Ինչպես փոխանցում է«Արմենպրես»-ը, այս մասին նշվում է խմբակցության հայտարարության մեջ:
Խմբակցությունից հիշեցրել են, որ դեռևս 2021 թվականի դեկտեմբերի 7-ին հայտարարել էին միջազգային կազմակերպությունների աշխատանքներին իրենց մասնակցությունը կասեցնելու մասին՝ հաշվի առնելով փաստը, որ խմբակցության մի խումբ պատգամավորներ գտնվում են կալանքի տակ, իսկ ոմանց դատարանն արգելել էր երկրից դուրս գալ:
«Հաշվի առնելով այն, որ պատգամավորների գործունեության ապօրինի սահմանափակումները վերացնելու վերաբերյալ մեր պահանջների զգալի մասը լուծվել է՝ «Հայաստան» խմբակցությունը որոշում է կայացրել վերականգնել իր մասնակցությունը միջազգային կազմակերպությունների աշխատանքներին»,- ասվում է խմբակցության հայտարարության մեջ։