Ալեն Սիմոնյանը շնորհավորական ուղերձներ է հղել Իրանի նախագահին և հոգևոր առաջնորդին

ԵՐԵՎԱՆ, 11 ՓԵՏՐՎԱՐԻ, ԱՐՄԵՆՊՐԵՍ:Հայաստանի Հանրապետության նախագահի լիազորությունները կատարող Ալեն Սիմոնյանն Իսլամական հեղափոխության հաղթանակի 43-րդ տարեդարձի առթիվ շնորհավորական ուղերձներ է հղել Իրանի Իսլամական Հանրապետության նախագահ Էբրահիմ Ռայիսիին և Իսլամական հեղափոխության գերագույն առաջնորդ Սեյյեդ Ալի Խամենեիին:

«Արմենպրես»-ի փոխանցմամբ՝ՀՀ նախագահի աշխատակազմից հայտնում են, որ Էբրահիմ Ռայիսիին ուղղված ուղերձում, մասնավորապես, ասվում է․

«Հայաստանը մեծապես կարևորում է դարերի խորքից եկող հայ-իրանական ջերմ ու բարիդրացիական հարաբերությունների հետևողական ամրապնդումը:

Հայաստանը և Իրանը այս տարի նշում են դիվանագիտական հարաբերությունների հաստատման 30-ամյակը, և գոհունակությամբ պետք է արձանագրեմ, որ մեր երկրների միջև համագործակցությունը շարունակաբար ընդլայնվում է երկուստեք հետաքրքրություն ներկայացնող տարբեր ոլորտներում:

Համոզված եմ, որ առաջիկայում ավելի կխորացնենք և կզարգացնենք փոխվստահության ամուր հիմքերի վրա խարսխված երկկողմ և բազմակողմ գործակցությունը՝ ի նպաստ մեր պետությունների առաջընթացի, տարածաշրջանի կայունության և մեր ժողովուրդների բարեկեցության»:

Իսլամական հեղափոխության գերագույն առաջնորդ Սեյյեդ Ալի Խամենեիին ուղղված ուղերձում ասվում է․

«Ջերմորեն շնորհավորում եմ Ձեզ և Իրանի բարեկամ ժողովրդին Իսլամական հեղափոխության հաղթանակի 43-րդ տարեդարձի կապակցությամբ:

Մեր ժողովուրդներին միավորում է փոխադարձ հարգանքի և վստահության վրա հիմնված սերտ բարեկամությունը, որը դարերի փորձություն է անցել:

Ուրախ եմ փաստել, որ Հայաստանը և Իրանը այս տարի նշում են դիվանագիտական հարաբերությունների հաստատման 30-ամյակը: Հայաստանը մշտապես առանձնահատուկ կարևորություն է տվել միջպետական համագործակցության ամրապնդմանը և երկկողմ օրակարգի հարստացմանը։

Համոզված եմ, որ հայ-իրանական ջերմ ու բարիդրացիական հարաբերությունները կշարունակեն զարգանալ և ընդլայնվել՝ ի նպաստ տարածաշրջանի կայունության և մեր ժողովուրդների բարօրության»։