Ճապոնիայի օժանդակությամբ Յոլյանի անվան արյունաբանական կենտրոնը կհամալրվի ախտորոշման նոր սարքավորմամբ
2 րոպեի ընթերցում
ԵՐԵՎԱՆ, 27 ՀՈՒՆՎԱՐԻ, ԱՐՄԵՆՊՐԵՍ: Յոլյանի անվան արյունաբանական կենտրոնը ՀՀ-ում Ճապոնիայի դեսպանատան աջակցությամբ կստանա ախտորոշման նոր սարքավորում, ինչը զգալիորեն ավելի ճշգրիտ կդարձնի արյան քաղցկեղի ախտորոշումը:
«Արմենպրես»-ի հաղորդմամբ սարքավորումը Հայաստանին կտրամադրվի ՀՀ-ում Ճապոնիայի դեսպանատան և ՀՀ ԱՆ Յոլյանի անվան արյունաբանական կենտրոնի միջև ստորագրված համաձայնագրի շրջանակում:
Առողջապահության նախարար Անահիտ Ավանեսյանը շեշտեց, որ այս նոր համագործակցության շնորհիվ Յոլյանի անվան արյունաբանական կենտրոնը ևս մեկ քայլ առաջ կգնա՝ արյան քաղցկեղի ախտորոշման և մոնիտորինգի հարցում: «Այս սարքը, անկասկած, կնպաստի կենտրոնի տեխնիկական հնարավորությունների հետագա բարելավմանը` այդպիսով ապահովելով մեր երկրում մահացության հիմնական պատճառներից մեկի վերահսկողությունը: Ուռուցքաբանական հիվանդությունների ախտորոշման և բուժման կատարելագործումը ՀՀ առողջապահության նախարարության առաջնահերթություններից մեկն է, մենք բարձր ենք գնահատում մեր ճապոնացի գործընկերների աջակցությունը և կարևորում մեր երկարամյա և արդյունավետ համագործակցությունը»,- ասաց Ավանեսյանը:
ՀՀ-ում Ճապոնիայի դեսպան Մասանորի Ֆուկուշիման իր ելույթում նշեց, որ շատ ուրախ է, որ դրամաշնորհային օժանդակություն է տրամադրվելու արյունաբանական կենտրոնին՝ բարելավելու արյան քաղցկեղի ախտորոշման հնարավորությունները: «Մենք լիահույս ենք, որ այս ծրագրի միջոցով կնպաստենք Հայաստանի առողջապահական ոլորտի զարգացմանը, ինչպես նաև մարդկանց կյանքի որակի բարելավմանը»,- ասաց դեսպանը:
Արյունաբանական կենտրոնի տնօրեն Սամվել Դանիելյանն էլ ընդգծեց, որ այս սարքի ձեռք բերումը կնպաստի արյունաբանական կենտրոնում բուժվող բոլոր հիվանդների ախտորոշումն ավելի ճշգրիտ իրականացնելուն և բուժման ավելի գրագետ մարտավարություն կազմակերպելուն: «Այն սարքը, որը Հայաստանում աշխատում է այս պահին, արդեն վաղուց իր ժամկետները սպառել է, և ճապոնական կառավարության և դեսպանի օժանդակությամբ մենք հնարավորություն ունենք այն թարմացնելու»,- ասաց նա: