1 րոպեի ընթերցում
ԵՐԵՎԱՆ, 15 ՆՈՅԵՄԲԵՐԻ, ԱՐՄԵՆՊՐԵՍ: Օղակաձև զբոսայգում կառուցվեց նոր ու ժամանակակից հանրային սքեյթ-պարկ: «Արմենպրես»-ի հաղորդմամբ` այն կառուցվել է Ուկրաինայի հայերի միության կողմից և Ուկրաինայում ապրող հայ համայնքի ներկայացուցիչների ֆինանսական օժանդակությամբ:
«Հուսով եմ այս անկյունը կդառնա մեր երեխաների համար առողջ ապրելակերպի անկյուն` նրանք կզբաղվեն սպորտով, ուրախ ժամանակ կանցկացնեն: Շատ մտքեր ունենք, նոր գաղափարներ, ուղղակի խնդիրը կախված է քաղաքապետարանից: Եթե հնարավորություն տվեցին կկարողանանք շարունակել մեր նախաձեռնությունները, եթե ոչ, ուրեմն կսպասենք մինչև այդ հնարավորությունը լինի: Կոչ եմ անում բոլոր սփյուռքի ներկայացուցիչներին ներդրումներ անել: Ամեն մեկը մի փոքր քայլով կարող է երկրին օգտակար լինել»,- ասաց Ուկրաինայի հայերի միության նախագահ Վիլեն Շատվորյանը:
Բացմանը ներկա էին Ազգային ժողովի նախագահ Ալեն Սիմոնյանը, Ուկրաինայի Գերագույն ռադայի պատգամավորներ, քաղաքական և հասարակական գործիչներ։
Բացման արարողությանը հաջորդեց մեծ համերգ՝ երգիչներ Հարութ Փամբուխչյանի, Գարիկի, Սոնայի, Ռեինկարնացիա բենդի մասնակցությամբ։ Համերգի հատուկ հյուրերն են Kazka և Hardkiss ուկրաինական խմբերը։