368.54
ՅՈՒՆԵՍԿՕ-ի կենտրոնակայանում տեղի է ունեցել Անրի Վերնոյի 100-ամյա հոբելյանին նվիրված միջոցառում
2 րոպեի ընթերցում
ԵՐԵՎԱՆ, 30 ՍԵՊՏԵՄԲԵՐԻ, ԱՐՄԵՆՊՐԵՍ: ՅՈՒՆԵՍԿՕ-ի կենտրոնակայանում (Փարիզ) սեպտեմբերի 29-ին Անրի Վերնոյի 100-ամյա հոբելյանին նվիրված միջոցառմանը ներկա է եղել նաև հայաստանյան պատվիրակությունը՝ ՀՀ կրթության, գիտության, մշակույթի և սպորտի նախարար Վահրամ Դումանյանի գլխավորությամբ և նախարարի տեղակալ Արա Խզմալյանի մասնակցությամբ:
«Վերնոյը ֆրանսիական կինոյի լեգենդներից է, նշանավոր արվեստագետ, ով, ամբողջությամբ ինտեգրված լինելով ֆրանսիական մշակույթին, հավատարիմ մնաց իր հայկական ինքնությանը: Նրա կինոժառանգության դերը համաշխարհային կինոարվեստում անգնահատելի է, իսկ բազմաժանր ստեղծագործություններն ու յուրօրինակ ռեժիսորական ոճը չեն ենթարկվում որևէ դասակարգման: Անրի Վերնոյի ծննդյան 100-ամյա հոբելյանին նվիրված այս միջոցառումն ունի կարևորագույն նշանակություն ոչ միայն վաստակաշատ կինոգործչի հիշատակը վառ պահելու, այլև հանրությանը բարձրորակ արվեստը ներկայացնելու տեսանկյունից»,- ինչպես «Արմենպրես»-ին տեղեկացնում են ԿԳՄՍ նախարարությունից՝ բացման իր խոսքում ասել է Վահրամ Դումանյանը:
Ֆրանսիայի Եվրոպայի և արտաքին գործերի նախարարին կից Զբոսաշրջության, արտերկրի ֆրանսիացիների և ֆրանկոֆոնիայի հարցերով պետքարտուղար Ժան-Բատիստ Լըմուան նշել է, որ ֆրանսիական արվեստն ու մշակույթը հարուստ են հայկական ծագմամբ արվեստագետների ավանդների շնորհիվ:
Միջոցառման ընթացքում ցուցադրվել է Անրի Վերնոյի մասին կենսագրական ֆիլմը: Նաև, տեղի է ունեցել համերգ, որին զուգահեռ ցուցադրվել են Վերնոյի ֆիլմերի թվայնացված ազդագրերը:
Համերգի ընթացքում հնչել են Անրի Վերնոյի ֆիլմերի երաժշտությունների կատարումները՝ Ժան-Կլոդ Պըտիի ղեկավարած ֆրանսիական «Pasdeloup» նվագախմբի կողմից, ինչպես նաև սոպրանո Լիաննա Ալեքսանյանը կատարել է «Դլե յաման» երգը՝ մարսելաբնակ դուդուկահար Լևոն Մինասյանի նվագակցությամբ:
Բաժանորդագրվեք մեր ալիքին Telegram-ում