Ալիևի հայտարարությունները ևս մեկ անգամ ապացուցում են, որ Արցախն Ադրբեջանի կազմում չի լինի երբեք․ Դավիթ Բաբայան

ԵՐԵՎԱՆ, 2 ՍԵՊՏԵՄԲԵՐԻ, ԱՐՄԵՆՊՐԵՍ: Արցախի Հանրապետության արտաքին գործերի նախարար Դավիթ Բաբայանն արձագանքել է Ադրբեջանի նախագահ Իլհամ Ալիևի՝ օրերս Շուշիում արած հայտարարություններին՝ շեշտելով, որ այդ հայտարարությունները միջազգային իրավունքի կոպտագույն խախտում են, նացիզմի և ահաբեկչության դրսևորում։

«Արմենպրես»-ի հետ զրույցում Արցախի Հանրապետության արտաքին գործերի նախարար Դավիթ Բաբայանն ընդգծեց, որ նախ և առաջ պետք է շնորհակալություն հայտնել Ալիևին նման հայտարարությունների համար, որովհետև դրանցով նա ցույց է տալիս իրենց բուն նպատակները: «Պետություններն ահռելի գումարներ են ծախսում թշնամու նպատակներն իմանալու համար, բայց այս մեկը առանց որևէ բանի ասում է: Ես բազմիցս ասել եմ՝ Ալիևը ամենաազնիվ թշնամին է. երբեք չի թաքցրել իր նպատակները: Իհարկե, այն, ինչ ասում է Ալիևը, միջազգային իրավունքի կոպտագույն խախտում է, նացիզմ է, ահաբեկչություն է, և մենք պետք է երբեք իրականությունից չկտրվենք, հասկանանք՝ ում հետ գործ ունենք: Այդ բոլոր հայտարարությունները ևս մեկ անգամ ապացուցում են, որ մենք Ադրբեջանի կազմում չե՛նք լինելու երբեք: Իսկ թե ինչ է ինքն ասում՝ իր գործն է: Կարևորը՝ մենք կարողանանք ապաքինվել և մեր սերունդների համար ստեղծենք հուսալի ապագա», - «Արմենպրես»-ին ասաց Արցախի արտգործնախարարը:

Օգոստոսի 30-ին Ադրբեջանի նախագահ Իլհամ Ալիևը, ելույթ ունենալով օկուպացված Շուշի քաղաքում և անդրադառնալով 2020 թ. աշնանը Արցախի Հանրապետության դեմ ադրբեջանական զինուժի իրականացրած լայնածավալ ռազմական ագրեսիային, մի շարք հայատյաց և ատելություն պարունակող հայտարարություններ էր արել: Մասնավորապես ասել էր, թե «Լեռնային Ղարաբաղի Հանրապետություն հասկացություն գոյություն չունի»: Նաև խոսել էր այն մասին, որ մինչև պատերազմը ԼՂՀ իշխանությունները պատրաստվում էին ԼՂՀ Ազգային ժողովի նոր շենք կառուցել Շուշիում: Բաքվի բռնապետն այդ շինությունը անվանել է «սատանայի որջ»՝ ասելով, թե իր հրամանով այն ամբողջությամբ ավերվել է:

Ալիևի կարծիքով՝ «իրադարձությունների ներկայիս ընթացքը, Ղարաբաղյան երկրորդ պատերազմը և միջազգային դերակատարների գործողությունները ցույց են տալիս, որ [Լեռնային Ղարաբաղի] հարցը երբեք չէր լուծվի բանակցությունների միջոցով»: Ադրբեջանի նախագահը հայտարարել է, թե իբր միջազգային իրավունքի բոլոր նորմերն ու սկզբունքները, մասնավորապես՝ ՄԱԿ-ի կանոնադրությունը, ՄԱԿ-ի Ավնտանգության խորհրդի բանաձևերը, «պատմական արդարությունը», իրավունք են տվել Ադրբեջանին հարցը լուծել ռազմական ճանապարհով, եթե այն չլուծվի խաղաղ ճանապարհով: Մինչդեռ մասնագետներն ասում են, որ միջազգային իրավունքի նորմերն ու սկզբունքները, այդ թվում՝ ՄԱԿ-ի կանոնադրությունը և Անվտանգության խորհրդի 4 հայտնի բանաձևերը նման բան չեն ենթադրում և կոնֆլիկտները ռազմական ճանապարհով լուծելու իրավունք չեն տալիս միջազգային իրավունքի որևէ սուբյեկտի:

Արամ Սարգսյան