Արցախում հաստատվել է կորոնավիրուսի երեք նոր դեպք

ԵՐԵՎԱՆ, 29 ԱՊՐԻԼԻ, ԱՐՄԵՆՊՐԵՍ։ Արցախում ապրիլի 29-ի ժամը 11։00-ի դրությամբ հաստատվել է կորոնավիրուսային հիվանդության երեք նոր դեպք։ Վարակակիրները նախկինում հաստատված օջախների կոնտակտավորներ են:

«Արմենպրես»-ի հաղորդմամբ՝ այս մասին հայտնում են Արցախի առողջապահության նախարարությունից։

«Արցախում գրանցվել է մահվան 1 դեպք, որը վերջին 6 ամսվա ընթացքում առաջինն է: Հիվանդը 60-ամյա կին է եղել, մահացել է կորոնավիրուսային հիվանդության հետևանքով»,- նշում են Արցախի ԱՆ-ից:

Մեկ օրում կատարվել է 70 թեստավորում։ Թեստավորման ընդհանուր թիվն այսպիսով Արցախում հասել է 23 860-ի։ Հաստատվել է կորոնավիրուսային հիվանդության ընդհանուր 2 664 դեպք։ 2021 թվականի սկզբից կորոնավիրուսի լաբորատոր հայտնաբերման նպատակով իրականացվել է 6 405 քաղաքացու հետազոտություն, որից 780-ի մոտ արձանագրվել է թեստի դրական պատասխան։

Կորոնավիրուսային հիվանդությունից այս պահին Արցախում ստացիոնար բուժում է ստանում 28 վարակակիր, իսկ թեթև հիվանդները ամբուլատոր բուժում են ստանում տնային պայմաններում: