Իվետա Մուկուչյանն իր մենահամերգին նոր երգեր կկատարի

ԵՐԵՎԱՆ, 18 ՄԱՐՏԻ, ԱՐՄԵՆՊՐԵՍ: Երգչուհի Իվետա Մուկուչյանը, որին երկրպագուների մի հոծ բազմություն անվանում է Իվա-դիվա, կներկայանա մենահամերգով:

«Արմենպրես»-ի հաղորդմամբ` Մուկուչյանի համերգային երեկոն տեղի կունենա Մայրության և գեղեցկության օրը՝ ապրիլի 7-ին Արամ Խաչատրյան համերգասրահում:

«Ապրիլի 7-ին շատ սպասված համերգ է լինելու. նոր երգեր, նոր ծրագիր, հանդիպում երկրպագուների հետ»,- «Ֆեյսբուքի» իր պաշտոնական էջում զետեղված տեսանյութում շեշտում է երգչուհին:

Գերմանահայ երգչուհի, երգահան, մոդել և դերասանուհի Իվետա Մուկուչյանը ծնվել է Երևանում, սակայն 5 տարեկանում տեղափոխվել է Համբուրգ: 2009-ին վերադարձել է Հայաստան և մասնակցել «Հայ սուպերսթար» հեռուստանախագծի չորրորդ եթերաշրջանին՝ զբաղեցնելով 5-րդ հորիզոնականը։ 2012 թվականին մասնակցել է «Գերմանիայի ձայնը» նախագծի երկրորդ եթերաշրջանին։ Նույն տարում «El Style» ամսագիրը նրան ճանաչել է «Ամենացանկալի հայուհի»։

2016 թվականի մայիսին «Սիրո ալիք» երգով ներկայացրել է Հայաստանը «Եվրատեսիլ» երգի միջազգային մրցույթում և գրավել 7-րդ տեղը:

Երաժշտասերների լայն շրջանակին հայտնի են Մուկուչյանի «Իմ անուշ Հայաստան», «Ամենա», «Հայաստան ջան», «Անհասանելի» և մի շարք այլ ստեղծագործություններ: