«Լուսաբաց». կիպրահայ երգիչ Հովիգը և Արփին ներկայացել են զուգերգով

ԵՐԵՎԱՆ, 11 ՄԱՐՏԻ, ԱՐՄԵՆՊՐԵՍ: «Եվրատեսիլ 2017» երգի ամենամյա մրցույթին Կիպրոսը ներկայացրած հայազգի երգիչ Հովիգը և սիրված երգչուհի Արփին հանդես են եկել զուգերգով: Նրանք հայերեն և հունարեն ներկայացրել են «Լուսաբաց» (Gnórimi Skiá) ստեղծագործությունը:

«Արմենպրես»-ի հաղորդմամբ՝ երգի հիման վրա նկարահանված տեսահոլովակն արդեն համացանցում է: Երգը գրել է Հովիգը, հայերեն բառերի հեղինակը Արմինե Հայրիյանն է, հունարեն բառերը գրել է Կատերինա Մարցուկուն, գործիքավորումն իրականացրել է Արթուր Թադևոսյանը: Հոլովակի ռեժիսորը Արմեն Փիրի Մասիհին է:

«Այս երգը գրել եմ տասը տարի առաջ: Ստեղծագործությունն ինձ շատ հոգեհարազատ է: Չափազանց ուրախ եմ և հպարտ, որ այն երկլեզու է և մոտ է իմ արմատներին: Հուսամ՝ դուք երգին կկապվենք այնպես, ինչպես ես»,-«Ֆեյսբուքի» իր պաշտոնական էջում գրել է Հովիգը:

Տարիներ առաջ «Արմենպրես»-ի թղթակցի հետ զրույցում Հովիգը պատմել էր, որ ծնվել է Կիպրոսում, հաճախել հայկական դպրոց և տանը հաղորդակցվել են հայերեն: «Կիպրոսի ժողովուրդն ինձ ճանաչում է որպես հայ երգիչ: Ինչ ինձ հիշում եմ, երաժշտության ոլորտում եմ: Այն ինձ համար լավագույն արտահայտչամիջոցն է: Հատկապես շատ էի երգում դպրոցում: «Նարեկ» վարժարանում ինձ Պավարոտի էին անվանում: 12 տարեկանում «Մելքոնյան» կրթական հաստատությունում ավելի մասնագիտացա երաժշտական ասպարեզում՝ մարզելով, մշակելով ձայնս»,-շեշտել էր Հովիգը:

Իսկ Արփին ծնվել է Խնձորեսկ գյուղում։ Հայաստանում, Էստոնիայում, Գերմանիայում, Ռուսաստանումև այլ երկրներում դարձել է մի շարք հանրապետական և միջազգային մրցույթների դափնեկիր։ 2007 թվականին Արփին թողարկել է «Կապույտ թռչուն» առաջին հիթը և արժանացել «Տարվա հայտնություն» մրցանակին։ 2011-ին որպես բեք-վոկալ մասնակցել է«Եվրատեսիլ» երգի միջազգային մրցույթին։ «Հայվեյ» խմբի հետ էլ մասնակցել է մի շարք երաժշտական փառատոների, ելույթ ունեցել բազմաթիվ համերգային ծրագրերում։

Անժելա Համբարձումյան