Կա հասկացվածություն, որ պետք է ստեղծված իրավիճակից դուրս գալու ճանապարհ գտնել. Մարուքյանը՝ Փաշինյանի հետ հանդիպումից հետո
2 րոպեի ընթերցում
ԵՐԵՎԱՆ, 4 ՄԱՐՏԻ, ԱՐՄԵՆՊՐԵՍ: «Լուսավոր Հայաստան» խմբակցության ղեկավար Էդմոն Մարուքյանն ամփոփել է ՀՀ վարչապետ Նիկոլ Փաշինյանի հետ հանդիպման արդյունքները և ներկայացրել մանրամասներ: Ինչպես տեղեկացնում է «Արմենպրես»-ը, հանդիպումից հետո լրագրողների հետ ճեպազրույցում Մարուքյանն ասաց, որ ընթացել են որոշակի չափով բանակցություններ` երկրում ստեղված իրավիճակից դուրս գալու հարցով:
«Ըստ էության, վարչապետը գլխավոր շտաբի պետի խնդիրը չի կապում արտահերթ ընտրությունների պրոցեսի հետ, բայց մենք ենք կապում: Իսկ ինչու ենք կապում, որովհետև երկրում եղած ճգնաժամին գումարվել է նաև գլխավոր շտաբի խնդիրը: Այս պահին չունենք որևէ համաձայնություն որևէ հարցի վերաբերյալ»,- ասաց Մարուքյանը:
«Լուսավոր Հայաստան» խմբակցության ղեկավարը կարևորեց խորհրդարանական մյուս ուժի` «Բարգավաճ Հայաստան» կուսակցության դիրքորոշումը այդ հարցով, որովհետև միայն «Լուսավոր Հայաստան» կուսակցության դիրքորոշմամբ չեն կարող պրոցեսներն առաջ գնալ, և խորհրդարանը չի կարող ցրվել:
«Հետևաբար` եթե տեղի ունենա ԲՀԿ-ի հետ հանդիպումը կամ ԲՀԿ-ի դիրքորոշումը պարզ կլինի, կարծում եմ, որ նորից կլինեն բանակցություններ, որովհետև այս պահին որևէ հարցով չունենք համաձայնություն, բայց այն, որ պետք է ճանապարհ գտնենք երկրում ստեղծված իրավիճակից դուրս գալու համար, այդ հարցում ունենք հասկացվածություն»,- եզրափակեց Մարուքյան:
Վարչապետ Նիկոլ Փաշինյանը մարտի 3-ին հայտարարել էր, որ հանդիպումներ է ունենալու ԱԺ ընդդիմադիր խմբակցությունների ղեկավարների հետ: «Լուսավոր Հայաստան»-ի ղեկավար Էդմոն Մարուքյանը մարտի 4-ին ժամանել է կառավարություն, որտեղ կայացել է նրա հանդիպումը վարչապետ Նիկոլ Փաշինյանի հետ: