Շուտով կսկսվի «Ինժեներական քաղաքի» կառուցումը. փոխվարչապետը մանրամասներ է հայտնել ծրագրի ընթացքից
1 րոպեի ընթերցում
ԵՐԵՎԱՆ, 12 ՓԵՏՐՎԱՐԻ, ԱՐՄԵՆՊՐԵՍ: «Ինժեներական քաղաքի» հատակագիծն արդեն հաստատվել է, շուտով կհայտարարվի նաև շինարարական ընկերության մրցույթը և կսկսվի քաղաքի կառուցումը: Ինչպես տեղեկացնում է «Արմենպրես»-ը, «Ֆեյսբուք»-ի իր էջում գրել է փոխվարչապետ Տիգրան Ավինյանը:
«Ինժեներական քաղաքի» ծրագիրը մտել է ակտիվ փուլ: Այն Համաշխարհային բանկի հետ համագործակցությամբ իրականացվող «Առևտրի խթանում և որակի ենթակառուցվածքներ» ծրագրի շրջանակում ֆինանսավորվող նախագծերից է:
Հայաստանում ապագայի քաղաքի հատակագիծն արդեն հաստատվել է, շուտով կհայտարարվի նաև շինարարական ընկերության մրցույթը և կսկսվի քաղաքի կառուցումը»,- գրել է Ավինյանը:
Փոխվարչապետը հավելել է, որ «Ինժեներական քաղաքը» բաղկացած է լինելու 22 ինժեներական ընկերությունների շինություններից, լաբորատորիայից, ավտոկայանատեղիից, այգուց և ինժեներական ենթակառույցներից: