2 րոպեի ընթերցում
ԵՐԵՎԱՆ, 27 ՀՈՒՆՎԱՐԻ, ԱՐՄԵՆՊՐԵՍ: Աշխարհի տարբեր երկրներում գործող հայագիտական կենտրոնների թիվը կավելանա:
«Արմենպրես»-ի մամուլի սրահում հրավիրված ասուլիսում ՀՀ կրթության, գիտության, մշակույթի և սպորտի նախարարի տեղակալ Արթուր Մարտիրոսյանը նշեց, որ նախատեսվում է գործող 8 հայագիտական կենտրոններին ավելացնել ևս երկուսը:
«Թե որտեղ են լինելու այդ հայագիտական կենտրոնները, դեռ չէի ցանկանա փակագծերը բացել: Դա մի քանի գործոններով է պայմանավրված, մենք աշխատում ենք մեր դեսպանատների հետ: Շատ կարևոր է նաև ընդունող կողմի հետաքրքրվածությունը, որ նրանք համաֆինանսավորում կատարեն և ծրագրերի շարունակականությունը ապահովեն: Շատ կարևորում եմ, որ դրանք լինեն ազդեցիկ հաստատություններում: Սփյուռքի ազդեցիկ կառույցների հետ համագործակցությամբ մտածում ենք նոր ձևաչափեր, որ այդ կենտրոնների ցանցի ընդլայնումը տեղի ունենա ոչ միայն պետբյուջեի հաշվին: Եվ մենք խնդիր ենք դրել, որ այդ բոլոր կենտրոնները ցանցային համագործակցության մեջ լինեն»,- նշեց Արթուր Մարտիրոսյանը:
Նոր հայագիտական կենտրոնները հիմնականում նույն քաղաքականությունն են իրականացնելու, ինչ գործողները, պարզապես այնպես է արվելու, որ դրանք ընդգրկվեն միասնական ցանցի մեջ: Հայկական մշակույթի, կրթության հանրահռչակումը լինելու է հայագիտական կենտրոնների գործունեության առանցքում: