390.33
Հայաստանում կբարելավվի դպրոցների ֆինանսավորման գործընթացը
2 րոպեի ընթերցում
ԵՐԵՎԱՆ, 25 ՀՈՒՆՎԱՐԻ, ԱՐՄԵՆՊՐԵՍ: Հանրապետությունում հանրակրթական հաստատությունների ֆինանսավորման գործընթացը կբարելավվի, փոփոխությունների է ենթարկվում դպրոցների ֆինանսավորման կարգը: «Արմենպրես»-ի մամուլի սրահում հրավիրված ասուլիսում ՀՀ կրթության, գիտության, մշակույթի և սպորտի նախարարի տեղակալ Ժաննա Անդրեասյանը նշեց, որ դպրոցների նախկինում սահմանված մեկ սովորող թվով հաշվարկը փոխարինվում է առավել ճկուն սկզբունքով: Սովորողի թվով հաշվարկի պահանջը փոխարինվում է ըստ հաստատության տիպի, իրականացվող կրթական ծրագրերի առանձնահատկությունների։
«Գործող կարգն էական խնդիրներ է առաջացնում փոքրաթիվ աշակերտական համակազմ ունեցող դպրոցներում: Ցավոք, այդ դպրոցները քիչ չեն մեր հանրապետությունում, հատկապես, մարզերում: Ֆինանսավորման նոր կարգը հնարավորություն կտա ավելի ճկուն քաղաքականություն վարել և դպրոցները պատշաճ ֆինանսավորել»,-ասաց Ժաննա Անդրեասյանը: Նրա խոսքով, դպրոցների ֆինանսավորումը կարող են խրախուսել նաև լրացուցիչ տարբերակներով:
Ժաննա Անդրեասյանն ընդգծեց, որ դպրոցների ֆինանսավորման դրույթը վերաձևակերպվել է այնպես, որ նախարարությունն ունենա ճկուն գործելու հնարավորություն: Աշակերտների թվով դպրոցների ֆինանսավորումն, ըստ նախարարի տեղակալի, բերում էր նրան, որ հանրակրթական հաստատությունները փորձում էին դասարանները կազմել աշակերտների առավելագույն թվով:
«Օրինակ, եթե դասարանի աշակերտների առավելագույն թիվ սահմանված է 35, ապա հենց այդքան թվով էլ կազմվում են դասարանները, ինչը բարդացնում է ուսուցչի գործը: Այլ կերպ դպրոցները վարվել չէին կարող, որովհետև ֆինանսավորվում էին սովորողների թվով: Հիմա դասարանի թվով ֆինանսավորումը հնարավորություն կտա ավելի շատ դասարաններ կազմավորել՝ քիչ երեխաներ ընդգրկելով ամեն դասարանում»,-ասաց Ժաննա Անդրեասյանը:
Բաժանորդագրվեք մեր ալիքին Telegram-ում