1 րոպեի ընթերցում
ԵՐԵՎԱՆ, 9 ՍԵՊՏԵՄԲԵՐԻ, ԱՐՄԵՆՊՐԵՍ: Հայաստանցի շախմատիստ Զավեն Անդրիասյանը հաղթող է ճանաչվել lichess․ org հարթակումանցկացված Bullet Shield Arena առցանց մրցաշարի հերթական փուլում:
«Արմենպրես»-ի հաղորդմամբ` այս մասին գրում է ՀԱՕԿ-ը: Չորսժամ տևած գերկայծակնային մրցաշարին մասնակցել են 4 303 շախմատիստներ։ Երևանցի գրոսմայստերն անցկացրել է 138 պարտիա, վաստակել է 396 միավոր և գրավել է առաջին տեղը:
Զավեն Անդրիասյանը 2005 թ. նվաճել է Եվրոպայի մինչև 16 տարեկանների հաղթողի կոչումը, նույն թվականին հաղթել է նաև այդ տարիքային խմբի Եվրոպայի արագ շախմատի առաջնությունում։ 2005-ին դարձել է «Աերոֆլոտ օփենի» «Բ» մրցաշարի հաղթող։ Նույն թվականին ստացել է միջազգային վարպետի կոչում։ 2006 թվականին նվաճել է Եվրոպայի մինչև 18 տարեկանների առաջնության արծաթե մեդալը, իսկ մեկ ամիս անց` 17 տարեկանում, դարձել է աշխարհի մինչև 20 տարեկանների չեմպիոն և անմիջապես ստացել գրոսմայստերի կոչում։ Այդ պահին նա Հայաստանի ամենաերիտասարդ գրոսմայստերն էր։ Տարբեր տարիներին դարձել է Հայաստանի արագ շախմատի չեմպիոն։ Հայաստանի մեծահասակների առաջնությունների եռակի բրոնզե մեդալակիր է։
Պատրաստեց Վարվառա Հայրապետյանը