Ադրբեջանը խաղաղության փոխարեն բնակչությանը պատրաստում է պատերազմի. Արցախի ԱԳ նախարարի հարցազրույցը

ԵՐԵՎԱՆ, 4 ՍԵՊՏԵՄԲԵՐԻ, ԱՐՄԵՆՊՐԵՍ: Լեռնային Ղարաբաղի հակամարտության կարգավորումը հայկական կողմը տեսնում է բացառապես խաղաղ ճանապարհով, իսկ Ադրբեջանն իր բնակչությանը խաղաղության պատրաստելու փոխարեն, պատրաստում է պատերազմի: «Արմենպրես»-ի փոխանցմամբ՝ այս մասին կատալոնական «Nationalia» օրաթերթին տված հարցազրույցում ասել է Արցախի Հանրապետության Արտաքին գործերի նախարար Մասիս Մայիլյանը: Հարցազրույցը հրապարակվել է Արցախի անկախության հռչակման 29-րդ տարեդարձի կապակցությամբ:

«Մեր հանրապետության դիրքորոշումն անփոփոխ է մնում անկախության հռչակումից ի վեր: Մենք միշտ կողմ ենք եղել հակամարտության կարգավորմանը բացառապես խաղաղ միջոցներով։ Այս դիրքորոշումը բազմիցս հնչեցվել է ինչպես հրապարակային, այնպես էլ ԵԱՀԿ գործող նախագահի և Մինսկի խմբի համանախագահների հետ հանդիպումների ժամանակ, ինչպես նաև ԱԳՆ բազմաթիվ հայտարարություններում, որոնք տարածվել են այնպիսի միջազգային կազմակերպություններում, ինչպիսիք են ԵԱՀԿ-ն, ՄԱԿ-ը, ԵԽ-ն և այլն»,- ասել է Մայիլյանը:

Արցախի արտգործնախարարը նշել է, որ միակողմանի հնարավոր չէ հասնել խաղաղությանը, իսկ Ադրբեջանի քայլերը ցույց են տալիս, որ այդ պետությունը պատրաստվում է պատերազմի:

«Եթե հաշվի առնենք այն տեմպերն ու թափը, որոնցով Ադրբեջանը մեծացնում է իր զինանոցը, ապա պարզ է դառնում, որ նա զենք է գնում ոչ թե այն պահեստում պահելու, այլ ավելի շուտ այն մի օր օգտագործելու մտադրությամբ: Մենք տեսել ենք, թե ինչպես է դա արել 2016թ. ապրիլին և բոլորովին վերջերս ՝ հուլիսի 12-ին, Հայ-ադրբեջանական սահմանին՝ Տավուշի ուղղությամբ։ Երկու դեպքում էլ Արցախի և Հայաստանի պաշտպանության ուժերը համապատասխան պատասխան են տվել։ Ոչ մի հիմք չկա ենթադրելու, որ Ադրբեջանը նման եւս մեկ փորձ չի անի, երբ իրեն բավականաչափ ուժեղ կզգա հերթական ռազմական արկածախնդրությունը սանձազերծելու համար: Խաղաղությունը չի կարող հասնել միակողմանիորեն, հակամարտության բոլոր կողմերը պետք է ձգտեն դրան»,- նշել է ԱԳ նախարարը:

Մայիլյանը հավելել է, որ հակամարտության կարգավորման հարցում կարևոր է, որ որպես կողմ բանակցային սեղան վերադառնա նաև Արցախի Հանրապետությունը:

«Ադրբեջանը պետք է մեկընդմիշտ հասկանա, որ առանց եռակողմ ձևաչափով բանակցությունների վերսկսման ՝ դրանց անմիջական մասնակցությամբ Արցախի Հանրապետությանը, միամտություն է ակնկալել որևէ շոշափելի առաջընթաց խաղաղ գործընթացում։ Հիշեցնեմ, որ խաղաղ գործընթացում միակ նշանակալի ձեռքբերումն այսօր 1994 թվականի մայիսի 12-ին հրադադարի մասին անժամկետ համաձայնագրի ստորագրումն էր, երբ Արցախը մասնակցեց բանակցություններին։ Եվ տրամաբանական է, որ եթե մարտական գործողությունների և կրակի դադարեցման մասին համաձայնագիրը ստորագրվել է Արցախի (Լեռնային Ղարաբաղի) կողմից ՝ որպես հակամարտության երկու հիմնական կողմերից մեկի, ապա, հետևաբար, խաղաղ համաձայնագիրը նույնպես պետք է համաձայնեցվի և ստորագրվի Արցախի կողմից։ Անտեսել այս փաստը կնշանակեր գիտակցաբար ժխտել աշխարհը»,- ասել է Մասիս Մայիլյանը:

Անդրադառնալով ԵԱՀԿ Մինսկի խմբի անդամ Թուրքիայի հայտարարություններին, որով վերջինս աջակցում է Ադրբեջանի ռազմական գործողություններին, Մայիլյանը նշել է, որ նման քայլը դատապարտելի է և անիմաստ է դարձնում նրա անդամակցությունը ԵԱՀԿ Մինսկի խմբին։