ԵՐԵՎԱՆ, 19 ՀՈՒՆԻՍԻ, ԱՐՄԵՆՊՐԵՍ: Բելառուսի նախագահ Ալեքսանդր Լուկաշենկոն հայտարարել է, որ իշխանություններին հաջողվել է խափանել երկրում իրավիճակն ապակայունացնելու նախագիծը:
«Արմենպրեսի» հաղորդմամբ, այս մասին տեղեկացնում է «ՌԻԱ Նովոստին»:
«Վերջին մի քանի օրերին հետևելով իրավիճակին՝ ես տեսնում եմ, որ ակտիվացել են կոնկրետ ուժեր, որոնք սկսել են ինտենսիվ գործել երկրում իրավիճակը ցնցելու համար: Մենք դա դիտարկել ենք... վաղուց: Ամեն դեպքում մեզ հաջողվել է կատարել որոշ քայլեր և խափանել Բելառուսում իրավիճակն ապակայունացնելու, երկիրը մայդանի բերելու մեծ նախագիծը»,- ասել է Լուկաշենկոն:
Նախագահը նշել է, որ հաջողվել է դիմակները պատռել ոչ միայն Բելառուսում գործող տիկնիկների, այլև նրանց ստեղծողների, որոնք գտնվում են Բելառուսից դուրս: Լուկաշենկոյի կարծիքով, ներկայում ինչպես Արևելքի, այնպես էլ Արևմուտքի քաղաքական հետաքրությունները կենտրոնացել են Բելառուսի վրա:
Նախօրեին ուժայինները ձերբակալել են Բելառուսի նախագահի պաշտոնին հավակնող Վիկտոր Բաբարիկոյին, ով ղեկավարել է «Բելգազպրոմբանկը»: Նա մեղադրվում է վկաների վրա ազդեցություն գործելու և ապացույցները կոծկելու համար: Մինսկում գտնվող «Բելգազպրոմբանկի» գրասենյակը խուզարկվել է: Իրավապահները նշում են, որ բանկի բազայի հիման վրա գործել է կազմակերպված հանցավոր խումբ, որը երկրից դուրս է հանել ավելի քան 430 միլիոն դոլար:
Բաբարիկոն հայտնել է, որ իշխանությունների գործողությունները քաղաքական ենթատեքստ ունեն: