Մեծամորի ԲԿ-ի շենքերից մեկը հատկացվեց Դատաբժշկական գիտագործնական կենտրոնին

ԵՐԵՎԱՆ, 30 ԱՊՐԻԼԻ, ԱՐՄԵՆՊՐԵՍ: Կառավարությունը թույլատրեց «Մեծամորի բժշկական կենտրոն»-ի 360․4 քմ շինությամբ լվացքատունը (արժեքը 10 մլն դրամ) ամրացնել Արմավիրի մարզպետի աշխատակազմին, ապա անժամկետ և անհատույց օգտագործման իրավունքով հատկացնել Առողջապահության նախարարության «Դատաբժշկական գիտագործնական կենտրոն» պետական ոչ առևտրային կազմակերպությանը:

«Արմենպրես»-ի փոխանցմամբ, որոշման հիմնավորման մեջ նշվում է, որ Արմավիրի մարզում դատաբժշկական փորձաքննությունների լիարժեք և արդյունավետ կազմակերպման համար պետք է առանձին տարածք՝ դատաբժշկական գործունեության համար անհրաժեշտ շենքային պայմաններով։

Նշված նպատակի համար թե աշխարհագրական տեղակայմամբ և թե առկա շենքային պայմաններով առավել նպատակահարմար է գտնվել սեփականության իրավունքով Մեծամորի ԲԿ­ին պատկանող, վերջինիս կողմից ներկայում չօգտագործվող շինություններից մեկը, որը հետագայում շենքային պայմանների բարելավման, տեխնիկական և լաբորատոր միջոցներով հագեցման աշխատանքներից հետո հնարավորություն կընձեռի լիարժեք կազմակերպելու վերը նշված գործընթացը: