2 րոպեի ընթերցում
ԵՐԵՎԱՆ, 8 ԱՊՐԻԼԻ, ԱՐՄԵՆՊՐԵՍ: Բարձր տեխնոլոգիական արդյունաբերության նախարարությունն առաջիկայում իր դրամաշնորհային ծրագրերով նոր հնարավորություններ կտա տեխնոլոգիական ոլորտի ընկերութուններին, այն ճարտարագետներին, որոնք արտակարգ դրության պայմաններում պարապուրդում են: «Արմենպրես»-ի հաղորդմամբ՝ այս մասին ասուլիսում հայտնեց ՀՀ բարձր տեխնոլոգիական արդյունաբերության նախարար Հակոբ Արշակյանը:
«Մեր դրամաշնորհային ծրագրերը շարունակական բնույթ են կրելու: Հիմա որոշակի հնարավորոթյուններ կան տեխնոլոգիական ոլորտի ընկերությունների համար, նրանց համար, որոնք ծառայությունների մատումամբ են զբաղվում: Դրամաշնորների շնորհիվ դրանք կկարողանան նաև ներդրումներ կատարել որոշ պրոդուկտների նախագծման և դրանց վաճառքների ուղղությամբ: Կորոնավիրուսով պայմանավորված՝ շուկայական պայմանների հետ կապված ընկերությունները, թիմի որոշ անդամներ կարող են պարապուրդի մեջ լինել: Սա նրանց համար, կարծում եմ, լավ հնարավորություն է, որ դիմեն դրամաշնորհային ծրագրերին, որոնք մենք առաջիկայում կհայտարարենք: Եվ պարապուրդի մեջ գտնվող ճարտարագետները հնարավորություն կունենան լծվել պրոդուկտների արտադրման գործին»,-ասաց նախարարը:
Նա նկատեց՝ պետության այս դրամաշնորհային ծրագրերը լավ հնարավորություն կարող են լինել: Պետությունն այս տարի շուրջ 930 մլն դրամ է նախատեսել այդ դրամաշնորհային ծրագրերի համար:
Նախարարությունն արդեն հայտարարել էր կորոնավիրուսի (COVID-19)տարածման կանխարգելմանն ուղղված մարտահրավերների հաղթահարմանն աջակցելու նպատակով դրամաշնորհների մրցույթ: Ընդունվել է 133 հայտ, որոնք ամփոփման փուլում են: