1 րոպեի ընթերցում
ԵՐԵՎԱՆ, 17 ՄԱՐՏԻ, ԱՐՄԵՆՊՐԵՍ։ Սանկտ Պետերբուրգի «Ավրորա» կինոթատրոնում մարտի 17-ին տեղի կունենա հայազգի լրագրող, վավերագրական ֆիլմի ռեժիսոր Աշոտ Ջազոյանի «Ընտանեկան հաշիվ» ֆիլմի պրեմիերան։
Ինչպես հաղորդում է «Արմենպրես»-ը՝ վկայակոչելով «ՌԻԱ Նովոստի»-ն, ֆիլմը պատմում է Վասիլի և Նատալիա Դոցենկոների ընտանիքում սիրո մասին. Ընտանիքն ապրում է քրիստոնեական կանոններով և դաստիարակում է երաժշտական տաղանդով օժտված 8 երեխայի:
Ֆիլմում ներկայացված են տան անդամների կյանքի մասին անկեղծ խոստովանությունները, խոհանոցում խոսակցությունները, ընտանիքի անդամների միջև ջերմությունը, ավագ երեխաների՝ Նադյայի և Վերայի կողմից ծնողների ամուսնության 25-ամյակի կապակցությամբ ընտանեկան հաշվի ստեղծումը, ամառային պարտեզում առաջին ընտանեկան ֆոտոսեսիայի նախապատրաստումը։
Ֆիլմն ավարտվում է աշնանային կադրերով, որոնց հեղինակը Կրասնոդարից լուսանկարիչ Օլգա Կոպիլն է։