ՀՀ արտգործնախարարությունն ուշադրության կենտրոնում է պահում Իտալիայում կորոնավիրուսի տարածման խնդիրը
4 րոպեի ընթերցում
ԵՐԵՎԱՆ, 24 ՓԵՏՐՎԱՐԻ, ԱՐՄԵՆՊՐԵՍ: ՀՀ արտաքին գործերի նախարարությունն ուշադրության կենտրոնում է պահում նաև Իտալիայում կորոնավիրուսի համաճարակի տարածման խնդիրը:
«Արմենպրես»-ի հարցին ի պատասխան՝ այս մասին փետրվարի 24-ին հրավիրված մամուլի ասուլիսում ասաց ՀՀ արտաքին գործերի նախարար Զոհրաբ Մնացականյանը:
«Ինչ վերաբերում է Իտալիային, սա նույնպես, բնականաբար, չէր կարող վրիպել մեր ուշադրությունից: Այստեղ նույնպես մենք գնահատում ենք, թե ինչ անհրաժեշտ քայլեր է պետք ձեռնարկել, որպեսզի պաշտպանենք մեր բնակչությանը և աշխատենք միասին, որպեսզի թույլ չտանք համաճարակի տարածումն ու հաղթահարենք այն միասին: Մենք գիտակցում ենք, որ այս հարցում ժամանակի կորուստ թույլ տալ չի կարելի»,- ասաց Մնացականյանը:
Անդրադառնալով կորոնավիրուսի դեմ պայքարող երկրների հետ համագործակցությանը՝ նախարարը նշեց, որ սերտ համագործակցություն է տարվել և տարվում Չինաստանի և Իրանի հետ:
«Դա մարտահրավեր է բոլոր երկրների համար, և այստեղ մեզ համար կարևոր մոտեցում է՝ համագործակցության միջոցով գտնել ճանապարհները՝ իրավիճակը վերահսկելու, համաճարակը կանխարգելելու և այն հաղթահարելու համար: Մենք շատ սերտ աշխատել ենք Չինաստանի հետ այդ առումով, շատ սերտ աշխատում ենք նաև Իրանի հետ»,- նշեց նա:
Կորոնավիրուսի կանխարգելման հանձնաժողովի նիստի արդյունքներով որոշվել է դադարեցնել ցամաքային հաղորդակցությունը Իրանի հետ, իսկ օդային հաղորդակցության նկատմամբ կիրառել ոչ ամբողջական սահմանափակումներ:
Նիստի ավարտի և դրա արդյունքներով ընդունված որոշումների մասին «Ֆեյսբուք»-ի իր էջում գրառում է կատարել ՀՀ վարչապետ Նիկոլ Փաշինյանը:
Նիստի արդյունքներով որոշվել է.
- Երկու շաբաթով դադարեցնել ցամաքային հաղորդակցությունը Իրանի Իսլամական Հանրապետության հետ:
- Օդային հաղորդակցության նկատմամբ կիրառել ոչ ամբողջական սահմանափակումներ:
- Իրանի Իսլամական Հանրապետության հետ բեռնափոխադրումները իրականացնել առանց սահմանափակումների, կիրառելով վարորդների նկատմամբ հատուկ հսկողության ռեժիմ:
- Որեւէ սահմանափակում չկիրառել Հայաստանի Հանրապետության եւ Իրանի Իսլամական Հանրապետության քաղաքացիների՝ հայրենիք վերադառնալու համար:
- Երկու շաբաթվա ընթացքում բարեկամ Իրանի Իսլամական Հանրապետության կառավարության հետ լինել սերտ հաղորդակցության մեջ, ամբողջացնել տեղեկությունները ԻԻՀ-ում կորոնավիրուսի տարածման ծավալների վերաբերյալ՝ հետագա անելիքները ճշգրտելու համար:
- Կառավարությունը քիչ անց հեռակա նիստով կկայացնի համապատասխան որոշում, որը ուժի մեջ կմտնի հրապարակման պահից:
«Հարկ եմ համարում արձանագրել, որ Հայաստանում կորոնավիրուսով վարակվածության ոչ մի դեպք չունենք եւ հույս ունեմ՝ չենք ունենա: Հայաստանը ունի բոլոր անհրաժեշտ տեխնիկական եւ մասնագիտական ռեսուրսները կորոնավիրուսի ճշգրիտ ախտորոշման համար»,- գրել է վարչապետը:
Հունվարի 30-ին Իտալիայի նախարարների խորհուրդը արտակարգ դրության ռեժիմ է սահմանել երկրում չինաստանցի երկու զբոսաշրջիկների մոտ կորոնավիրուսի հայտնաբերումից հետո: Այդ մասին հայտնել է Կիջի կառավարական պալատը: Իտալիայում արտակարգ դրության ռեժիմի գործողությունը կշարունակվի վեց ամիս: