Կամուրջ անցյալի և ներկայի միջև. Adana Project-ը մենահամերգին կներկայացնի առաջին՝ «Վերադարձ» ալբոմը
3 րոպեի ընթերցում
ԵՐԵՎԱՆ, 7 ՓԵՏՐՎԱՐԻ, ԱՐՄԵՆՊՐԵՍ:Adana Project ռոք խումբը, որը մշակում և նորովի է մատուցում հին հայկական ազգագրական, ժողովրդական, մոռացված էստրադային երգեր, մարտի 30-ին հանդես կգա մենահամերգով: Այն տեղի կունենա Հ. Թումանյանի անվան պետական տիկնիկային թատրոնում:
Համերգին խումբը երաժշտասերների դատին կհանձնի իր առաջին`«Վերադարձ» ձայնասկավառակը, որում զետեղել է հինգից ավելի ստեղծագործություն:
«Արմենպրես»-ի թղթակցի հետ զրույցում խմբի մեներգչուհի Մանե Տոնոյանն ասաց, որ նոր ոգով և թարմ երգերով են ներկայանալու: «Երկու երգի պրեմիերա է նախատեսվում, երկուսն էլ՝ զուգերգ, բայց դեռ չեմ բացահայտի, թե ում հետ եմ ելույթ ունենալու: Կատարելու ենք «Իմ Էլինար» գործը, որը ոչ մի համերգի չենք հնչեցրել»,-նշեց նա:
Անդրադառնալով ալբոմում ներառված երգերին՝ Մանեն շեշտեց, որ բոլոր ստեղծագործությունները քավր են. դրանցից երեքը («Գինի լից», «Թարմ ծաղիկներ», «Իմը չես, գիտեմ») տեսահոլովակ ունի:
Adana Project-ը մի քանի տարվա պատմություն ունի: Մանեն թիմին է միացել երեք տարի առաջ: «Ինձ գրավում է հայրենասիրական ռոքը, որը սկզբում ինձ մի քիչ խորթ էր, քանի որ հիմնականում ջազ կամ բլյուզ էի երգում: Աշխատանքի արդյունքում դարձել ենք մի բռունցք և դանդաղ, բայց հաստատուն քայլերով առաջ ենք շարժվում»,- ընդգծեց երգչուհին և հավելեց, որ խմբին շատ է աջակցում Adana Project-ի պրոդյուսեր Անդրե Սիմոնյանը:
Պրոդյուսեր Անդրե Սիմոնյանն էլ ուրախությամբ ասաց, որ խումբը շատ սիրված է: «Նկատել եմ` տարբեր երաժշտական փառատոնների ժամանակ մերոնց ելույթներին անհամբերությամբ են սպասում: Adana Project-ի նպատակն է երաժշտության միջոցով կամուրջ դառնալ անցյալի և ապագայի միջև: Խումբը ռոք և հեվի մեթալ ոճով է ներկայացնում շատերի կարծիքով ժամանակավրեպ ստեղծագործությունները և թարմ շունչ հաղորդում դրանց: Լսարանին դա դուր է գալիս»,-նշեց Սիմոնյանը:
Անդրեն տեղեկացրեց, որ խումբն արտերկրում հանդես գալու շատ առաջարկներ է ստանում, ինչն իր համար հաճելի է:
«Խումբը ճանաչում են նաև Հայաստանի սահմաններից դուրս: Այս օրերին պետք է Լիբանանում լինեինք, բայց այնտեղ ծագած քաղաքական խնդիրների պատճառով մեր այցը հետաձգվեց: Հույս ունեմ, 2020-ին Adana Project-ը ելույթներ կունենա տարբեր երկրներում»,-շեշտեց պրոդյուսերը:
Adana Project-ի հիմնադիրներն են Արին և Արիս Քարամյանները. Արինը ստեղնաշարային գործիքներ է նվագում, իսկ Արիսը` հարվածային: Խմբի կիթառահարներն են Պատրիկ Ավետիսյանն ու Ռոման Մնացականյանը, բաս կիթառահարն է Գեղամ Ղազարյանը, մեներգչուհին` Մանե Տոնոյանը:
Անժելա Համբարձումյան
Լուսանկարները` խմբի «Ֆեյսբուք»-ի պաշտոնական էջից