ՁԻԱՀ-ի կանխարգելման կենտրոնի և «Նորք» ինֆեկցիոն հիվանդանոցի միավորմամբ կրճատումներ չեն լինի
2 րոպեի ընթերցում
ԵՐԵՎԱՆ, 31 ՀՈՒՆՎԱՐԻ, ԱՐՄԵՆՊՐԵՍ: Հայաստանում ՁԻԱՀ-ի կանխարգելման հանրապետական կենտրոնի և «Նորք» ինֆեկցիոն կլինիկական հիվանդանոցի միավորման արդյունքում այդ երկու կենտրոններում որևէ գործառույթի և բուժանձնակազմի կրճատում չի լինի:
«Արմենպրես»-ի հաղորդմամբ՝ այս մասին հունվարի 31-ին իր ասուլիսում հայտնեց ՀՀ առողջապահության նախարար Արսեն Թորոսյանը:
«ՁԻԱՀ-ի կանխարգելման կենտրոնը պարզապես միավորվում է մեկ ուրիշ պետական բժշկական կազմակերպության հետ՝ այդ հիվանդության հետ պայքարի միջազգային առաջարկների շրջանակներում: ՁԻԱՀ-ը, երբ հայտնաբերվել է մոտ 40 տարի առաջ, անհրաժեշտություն է ունեցել առանձին հաստատության կողմից կառավարվելու, հսկվելու, բուժվելու, սակայն գիտության ձեռքբերումները և ընդհանրապես միջազգային մոտեցումներն այդ հիվանդության հարցում բերել են նրան, որ ՁԻԱՀ-ի դեմ պայքարը պետք է ինտեգրվի ընդհանուր առողջապահական համակարգի մեջ, և այդ միաձուլումը կատարվում է դրա շրջանակում: Որևէ ֆունկցիայի կրճատում այդ երկու կենտրոնների շրջանակներում չի լինելու, նաև չի լինելու բժշկական անձնակազմի կրճատում»,-վստահեցրեց Թորոսյանը:
ՀՀ կառավարությունն հունվարի 30-ին նիստում ընդունվելու է ՁԻԱՀ-ի կանխարգելման հանրապետական կենտրոն» ՓԲԸ և «Նորք» ինֆեկցիոն կլինիկական հիվանդանոց» ՓԲԸ միավորման մասին հարցը: