ԵՐԵՎԱՆ, 30 ՀՈԿՏԵՄԲԵՐԻ, ԱՐՄԵՆՊՐԵՍ: Բաց կառավարման գործընկերության անդամ 79 երկրների շրջանակում Հայաստանը համարվում է ժողովրդավարության պայծառ ու լուսավոր կետ: Ինչպես հաղորդում է «Արմենպրես»-ը, Բաց կառավարման գործընկերություն (ԲԿԳ) - Հայաստան աշխատանքային խմբի հանդիպմանն այս մասին ասել է ԲԿԳ գործադիր գլխավոր տնօրեն Սանջեյ Փրադանը:

«Հայաստանի ոչ բռնի, թավշյա հեղափոխությունը մեծ ազդակ էր, որը տրվել էր քաղաքացիների կողմից և արտահայտում էր քաղաքացիների կամքը՝ երկրում փոփոխություններ իրականացնելու»,-  նշել է Սանջեյ Փրադանը:

Ըստ նրա՝ Հայաստանի համար հաջորդ քայլը պետք է լինի կառավարության նկատմամբ քաղաքացիների վստահությունը  բարձրացնելը, ինչի կարող են նպաստել երկրում տնտեսական և իրավական իրական բարեփոխումները:

ԲԿԳ գործադիր գլխավոր տնօրենի խոսքով՝ Հայաստանը օրինակելի է  ԲԿԳ հանձնառությունների իրականացման հարցում, ինչպես նաև կարևորել է հաջորդ գործողությունների ծրագրում նպատակաուղղված հանձնառությունների շրջանակը ընդլայնելը:

Սանջեյ Փրադանը պատրաստակամություն է հայտնել նաև  աջակցել Հայաստանին՝ դատաիրավական, հակակոռուպցիոն և տնտեսական բարեփոխումներ իրականացնելու  հարցում: