Ապագա ճարտարապետների նվերը ուրախացրել է DAA հիվանդանոց-դպրոցի երեխաներին

ԵՐԵՎԱՆ, 11 ՀՈՒԼԻՍԻ, ԱՐՄԵՆՊՐԵՍ: Ապագա ճարտարապետների նվերը ուրախացրել և ոգևորել էԱնմիջական օգնության ասոցիացիայի (DAA)հիվանդանոց-դպրոցի երեխաներին:

Ինչպես «Արմենպրես»-ին հայտնեց ՃՇՀԱՀ մամուլի քարտուղար Ժասմին Վիլյանը, նրանց անկեղծ խանդավառությունը ամենամեծ շնորհակալությունն է Ճարտարապետության և շինարարության Հայաստանի ազգային համալսարանի (ՃՇՀԱՀ) և Ստամբուլի ՄԵՖ համալսարանի ճարտարապետության ֆակուլտետի ուսանողներին և ծրագրի կազմակերպիչների համար:

«Հրանտ Դինք» հիմնադրամի նախաձեռնությամբ «Ամառային դպրոց» ծրագրի շրջանակներում, ՀՀ-ում ԱՄՆ դեսպանատան աջակցությամբ DAA հիվանդանոց-դպրոցի բակում բացվեց էկոլոգիապես մաքուր՝ փայտե խաղահրապարակ, կառուցված ՃՇՀԱՀ-ի և ՄԵՖ համալսարանի ուսանողների նախագծով և նրանց ներուժով:

Խաղահրապարակի բացումը իր շուրջն էր համախմբել ՀՀ ԱԳՆ, ԿԳՄՍՆ, նշանավոր ճարտարապետների, առողջապահության ոլորտի, ՀԿ-ների ներկայացուցիչներին: Միջոցառմանը իրենց շնորհակալական խոսքը ասացին Ստամբուլի ՄԵՖ համալսարանի դասախոսներ և միջոցառմանը ներկա այլ հյուրեր:

««Հրանտ Դինք» հիմնադրամի այս ծրագիրը քաղաքական չէ: Ինչպես գիտեք քաղաքական ծրագրերը հաճախ տարանջատող են, իսկ մշակույթային, կրթական ծրագրերը միավորող: Սրանով է հետաքրքիր այս ծրագիրը: Մենք հույս ունենք, որ այն կլինի շարունակական և կնպաստի երկու երկրների համալսարանների համագործակցությանը:»,- շնորհակալություն հայտնելով բոլոր կողմերին ծրագրի իրականացման համար խաղահրապարակի բացմանը ասաց ՀՀ-ում ԱՄՆ-ի դեսպանատան Հասարակայնության հետ կապերի բաժնի տնօրեն Ռոբերտ Անդերսոնը:

«Ամառային դպրոց» ծրագրով խաղահրապարակի նախագծման և կառուցման աշխատանքներին ներգրավված են եղել ՄԵՖ համալսարանի 10 ուսանող, 2 դասախոս: ՃՇՀԱՀ-ից՝ 10 ուսանող, 2 դասախոս, աշխատանքներին մասնակցել են 5 ասիստենտ:

Երեխաները նույնպես իրենց երախտիքի խոսքը հայտնեցին՝ փոքրիկ համերգային ծրագրով: Նրանց անկեղծ կատարումը հուզեց ներկաներին և առանձնակի շուք և տրամադրություն պարգևեց միջոցառմանը:

ՃՇՀԱՀ-ի ռեկտոր Գագիկ Գալստյանի անունից համալսարանի Միջազգային կապերի գծով պրոռեկտոր Վարդգես Եդոյանը իրականացված ծրագրի համար շնորհակալություն հայտնեց «Հրանտ Դինք» հիմնադրամին, ՀՀ-ում ԱՄՆ-ի դեսպանատանը և առանձնակի կարևորեց ուսանողների և նրանց հետ աշխատող դասախոսների աշխատանքը. «Ամռան այս շոգ օրերին ուսանողները այս փոքրիկ շինհրապարակում աշխատում էին մեծ ոգևորությամբ, կյանքի կոչելով իրենց նախագիծը: Այս խաղահրապարակը կառուցված է սիրով:» Միևնույն ժամանակ պրոռեկտորը հիշեցրեց, որ ուսանողները այս նույն ծրագրով, նույն ոգևորությամբ անցած տարի ամռանը աշխատեցին Ստամբուլում:

«Հրանտ Դինք» հիմնադրամի նախաձեռնած «Ամառային դպրոց» ծրագրի շրջանակներում 2018-ին ՃՇՀԱՀ-ի ուսանողները Ստամբուլում ՄԵՖ համալսարանի Ճարտարապետական ֆակուլտետի ուսանողների հետ միասին նախագծել և իրենց ջանքերով կառուցել են խաղահրապարակ Ստամբուլում բնակվող Հայաստանի քաղաքացի միգրանտ երեխաների համար՝ «Հրանտ Դինք» անունը կրող դպրոցի բակում: