Ժամանակը Երևանում՝ 11:07:36,   5 Հունիս

Քաղաքացիների, լրագրողների հարցումներին պատշաճ չպատասխանելու առիթով նախորդ տարի աճել է ՄԻՊ-ին հասցեագրված բողոքների թիվը

  Քաղաքացիների, լրագրողների հարցումներին պատշաճ չպատասխանելու առիթով 
նախորդ տարի աճել է ՄԻՊ-ին հասցեագրված բողոքների թիվը

ԵՐԵՎԱՆ, 29 ԱՊՐԻԼԻ, ԱՐՄԵՆՊՐԵՍ: Հայաստանում պետական մարմինների կողմից քաղաքացիների՝ այդ թվում նաև լրագրողների հարցումներին պատշաճ չպատասխանելու առիթով դիմումների թիվը 2017-ի համեմատ 2018-ին կրկնակի ավելացել է: «Արմենպրես»-ի հաղորդմամբ՝ այս մասին ԱԺ մարդու իրավունքների պաշտպանության և հանրային հարցերի մշտական հանձնաժողովի նիստում ասաց Հայաստանի մարդու իրավունքների պաշտպան Արման Թաթոյանը՝ ներկայացնելով նախորդ տարվա Մարդու իրավունքների պաշտպանի գործունեության և մարդու իրավունքների և ազատության  պաշտպանության վիճակի մասին տարեկան հաղորդումը և 2018-ի գործունեության վերաբերյալ տարեկան զեկույցը:

«Ինֆորմացիայի ազատության հետ կապված առանձին վերլուծություն է արվել։ Մասնավորապես 2017-ի համեմատ երկու անգամ աճել են 2018-ի բողոքները, որ պետական մարմինները պատշաճ չեն պատասխանում քաղաքացիների և լրագրողների հարցումներին: Իսկ 2016-ի համեմատ 2018-ի բողոքների թիվն աճել է 3 անգամ»,-ներկայացրեց Թաթոյանը:

Մարդու իրավունքների պաշտպանը նշեց, որ ներկայացված զեկույցում մեծ ուշադրություն են ցուցաբերել լրագրողների աշխատանքին: «Պետական մարմինը լրագրողին պետք է վերաբերի օրինավորության, բարեխղճության կանխավարկածով: Այսօր կա կարծրատիպ, թե լրագրողը խոչընդոտում է պետական մարմնի աշխատանքը։ Ես կարծում եմ, որ դա պետք է փոխել»,-ասաց Թաթոյանը:

Նա նկատեց, որ զուգահեռ պետք է շարունակաբար զարգանա լրագրողի պրոֆեսիոնալիզմի աստիճանը: Նա դա կարևորեց համատեղ համագործակցություն ապահովելու համար:

 

 





https://zen.yandex.ru/id/5dee07a31e8e3f00ae3051c1


youtube

Բոլոր նորությունները    


New Xar

Գործակալության մասին

Հասցե՝ Հայաստան, 0002, Երեւան, Սարյան փող 22, Արմենպրես
Հեռ.՝ +374 11 539818
Էլ-փոստ՝ [email protected]
settings Էջի կարգավորումներ