Ժամանակը Երևանում՝ 11:07:36,   17 Նոյեմբեր

Հայաստանի կառուցապատող ընկերությունների ներկայացուցիչները մի շարք խնդիրներ են տեսնում իրանական ցեմենտի համար տուրք սահմանելու պարագայում

Հայաստանի կառուցապատող ընկերությունների ներկայացուցիչները մի շարք խնդիրներ 
են տեսնում իրանական ցեմենտի համար տուրք սահմանելու պարագայում

ԵՐԵՎԱՆ, 18 ԱՊՐԻԼԻ, ԱՐՄԵՆՊՐԵՍ: Հայաստանի կառուցապատող ընկերությունները իրանական ցեմենտի տուրքի սահմանման, հետևաբար՝ գնի բարձրացման պարագայում արդեն նախապես կնքված գործարքները վերանայելու և կառուցապատման արժեքների բարձրացման խնդիր են ունենալու:

«Արմենպրես»-ի հաղորդմամբ՝ ապրիլի 18-ին Տնտեսական զարգացման նախաձեռնությունների կենտրոնի նախաձեռնությամբ կազմակերպված՝ ցեմենտի ներկրման տուրքի վերաբերյալ օրինագծի շուրջ ստեղծված իրավիճակի վերաբերյալ քննարկմանը շրջանառության մեջ գտնվող և ԱԺ հանձնաժողովի հավանությանն արժանացած օրենքի նախագծի վերաբերյալ իրենց  վերապահումները ներկայացրեցին կառուցապատող ընկերությունների ներկայացուցիչները:

«Կառուցապատողների համար առաջանալու են իրավական խնդիրներ: Կառուցապատողները նախքան շենքը կառուցապատել, ավարտելը գնման իրավունքի շրջանակներում պայմանագրեր են կնքում գնորդների, տարբեր մատակարարների, ծառայություն մատուցողների հետ: Կառուցապատողը պայմանական 1 քառ. մետրի համար 500 հազար դրամով պայմանագիր է կնքել պոտենցիալ գնորդի հետ, ստանձնել է պարտավորություն, որ այդ գնով պետք է փոխանցի գնորդին: Բայց եթե շինարարության ընթացքում ցեմենտի գինը թանկանում է, շինարարական կազմակերպությունները կառուցապատման արժեքի բարձրացման խնդիր են դնում և առաջանում են խնդիրներ, ճեղքվածքներ կամ ինքնարժեքի բարձրացում, շահույթի նվազում, որը նվազեցնում է կառուցապատման ոլորտում ներդրումներ կատարելու գրավչությունը»-ասաց  «Իսթեյթ Ինվեսթմենթ ընդ Դիվելոփմենթ» ընկերության օտարերկրյա ներդրող-բաժնետիրոջ ներկայացուցիչ Կարեն Գասպարյան

Նրա կարծիքով՝ իրանական ցեմենտը միշտ եղել է ավելի մատչելի և որակյալ: Գասպարյանի կարծիքով՝ իրանական ցեմենտի գինը միշտ զսպող գործիք է հանդիսացել տեղական շուկայում արտադրողների համար, և ներկրվող ցեմենտի գնի բարձրացումը փակելու է  տեղական արտադրողների համար մրցակցության ապահովման վերջին լուսամուտը:

Կառուցապատող մեկ այլ ընկերության «Արթ քոմփանի» ՍՊԸ-ի ներկայացուցիչ Վահե Պետրոսյանի կարծիքով՝ իհարկե տեղական արտադրողին պետք է պաշտպանել, սակայն նա նկատում է, իրանական ցեմենտը վաճառելու համար առանց այդ էլ խոչընդոտեր կան: «Մեր կլիմայական պայմաններում ցեմենտը մինչ Մեղրիից Երևան է հասնում, բավականին թանկանում է՝ տարբեր գնահատականներով 15-19 հազար դրամով: Այդ թանկացումն արդեն իսկ օգնում է բոլոր տեղական արտադրողներին, և պետական տուրք գումարելը, մեր գնահատականով, ներմուծմանը խիստ վնաս է հասցնելու: Իրանական արտադրանքը լավն է, ավելի արդյունավետ է, կարծում ենք, որ պետք է հնարավորություն տանք, որ տեղական արտադրողները պաշտպանված լինեն, սակայն ներմուծման համար էլ չփակենք դռները»,-նշեց նա:

ՀՀ տնտեսական զարգացման և ներդրումների նախարարության արդյունաբերական քաղաքականության վարչության պետ Արմեն Եգանյանը նշեց, որ վարչապետը հանձնարարականով ևս մեկ անգամ ,հաշվի առնելով բոլոր կողմերի շահերը, քննարկում կկազմակերպեն՝ նախքան նման օրենքի ընդունումը:

ՀՀ ազգային ժողովի տնտեսական հարցերի մշտական հանձնաժողովի նիստում քննարկվել և հավանության էր արժանացել «Պետական տուրքի մասին» ՀՀ օրենքում լրացում կատարելու մասին» եւ «Գործունեության իրականացման ծանուցման մասին» ՀՀ օրենքում լրացում կատարելու մասին» օրինագծերի փաթեթը, որով նախատեսվում է տեղական արտադրանքը խրախուսելու նպատակով Իրանից ներկրվող ցեմենտի համար սահմանել պետտուրք: Կառավարության ներկայացրած նախագծով և ցեմենտի, և կլինկերի համար առաջարկվել էր տուրքի նույն չափը: Սակայն նախագծի զեկուցող ՀՀ տնտեսական զարգացման և ներդրումների նախարար Տիգրան Խաչատրյանը նշել էր, որ եթե պատգամավորները նպատակահարմար գտնեն մեկի վրա տարածել, մյուսի վրա ոչ, կքննարկեն դա առաջինից երկրորդ ընթերցման ընթացքում: Արդյունքում հանձնաժողովը նախագիծը հավանության էր արժանացրել՝ միայն ցեմենտի վրա տարածելու տարբերակով՝ 1 տարի ժամկետով: Դրանից հետո «ԱրարատՑեմենտ»-ի շատ աշխատակիցները, աշխատանքից ազատման մասին ծանուցագրեր ստանալով, բողոքի ակցիա էին իրականացնում: Ընկերությունից մեկնաբանել են՝ խնդիրն այն է, որ առաջարկվող նախագծով պետտուրք չի սահմանվում Իրանից ներկրվող կլինկերի համար, ինչը անհավասար պայմաններ է ստեղծում տեղական արտադրանքի համար:

 

 




youtube

Բոլոր նորությունները    


Haypost

New Xar

Գործակալության մասին

Հասցե՝ Հայաստան, 0002, Երեւան, Սարյան փող 22, Արմենպրես
Հեռ.՝ +374 11 539818
Էլ-փոստ՝ [email protected]
settings Էջի կարգավորումներ