ԵՐԵՎԱՆ, 25 ՓԵՏՐՎԱՐԻ, ԱՐՄԵՆՊՐԵՍ: ՀՀ Ազգային ժողովի մարդու իրավունքների պաշտպանության և հանրային հարցերի մշտական հանձնաժողովը բացասական եզրակացություն տվեց «Արհեստակցական միությունների մասին» Հայաստանի Հանրապետության օրենքում լրացումներ կատարելու մասին նախագծին: «Արմենպրես»-ի փոխանցմամբ՝ նախագծի հեղինակներն են պատգամավորներ Գևորգ Պետրոսյանը, Նորա Առուստամյանը, Վարդան Ղուկասյանը, Արթուր Գրիգորյանը և Հրանտ Մադաթյանը:

«Բարգավաճ Հայաստան» խմբակցության անդամ Գևորգ Պետրոսյանը նշեց, որ անկախ արհեստակցական մարմին ստեղծելու նպատակն այն է, որ աշխատակիցները կարողանան անդամակցել մի կազմակերպության, որը կախվածություն չի ունենա իրենց գործատուից: «Գործող օրենքով արհմիությունները ստեղծվում են տվյալ գործատուի մոտ, այդ գործատուի հետ աշխատանքային հարաբերությունների մեջ գտնվող գործատուների թվից: Քանի որ ֆինանսավորման հիմնական աղբյուրը եղել ու մնում է գործատուի կողմից տրվող հատկացումները, արհմիությունները կաշկանդված են, և կնքում են գործատուի ցանկացած որոշում: Ստեղծում ենք անկախ արհեստակցական կազմակերպություն, որ աշխատակիցները կարողանան անդամակցել և իրենց աշխատավայրում գործող արհմիությանը, և ցանկության դեպքում նաև իրենց գործատուից որևէ կախվածություն չունեցող արհեստակցական միությանը»,- ասաց Պետրոսյանը:

Պատգամավորը հիշեցրեց, որ նախագիծը շրջանառության մեջ է դրվել դեռևս 6-րդ գումարման Ազգային ժողովի գործունեության ընթացքում: «Առաջին ընթերցում անցնելուց հետո վերջին նիստում պատգամավորների բացակայության պատճառով քվորում չապահովվեց ու նախագիծը երկրորդ ընթերցմամբ չընդունվեց: Նախագիծը բացարձակապես չի սպառնալու գործող Արհեստակցական միությունների գործունեությանը»,- նշեց Գևորգ Պետրոսյանը:

ՀՀ աշխատանքի և սոցիալական հարցերի նախարարի տեղակալ Արման Ուդումյանը նշեց, որ կառավարությունը բացասական եզրակացություն է տվել նախագծին: «Գործող օրենսդրությամբ ճյուղային մակարդակով նրանք կարող են ունենալ արհմիություն, որը կախված չի լինի որևէ գործատուից: Առաջանալու են բազմաթիվ խնդիրներ, որոնք ավելի են բարդացնելու այդ արհմիությունների կյանքը»,- ասաց Ուդումյանը:

Հանձնաժողովը 4 կողմ, 5 դեմ ձայնով բացասական եզրակացություն տվեց նախագծին: ԱԺ լիագումար նիստի սկզբում կողմերը հնարավորություն կունենան 3-ական րոպե տևողությամբ ներկայացնելու նախագծի վերաբերյալ իրենց տեսակետը: