ԵՐԵՎԱՆ, 1 ՆՈՅԵՄԲԵՐԻ, ԱՐՄԵՆՊՐԵՍ: Կառավարությունը  հավանություն տվեց  «Հայաստանի Հանրապետության վարչապետի աշխատակազմ» պետական կառավարչական հիմնարկին ամրացված ավտոմեքենաները ետ վերցնելու և, համապատասխանաբար, ՀՀ նախագահի աշխատակազմին, Պետական վերահսկողական ծառայությանն ու Սպորտի և երիտասարդության հարցերի նախարարությանն ամրացնելու մասին որոշման նախագծին:

 Ինչպես փոխանցում է «Արմենպրես»-ը, որոշմամբ կառավարությունը  հանձնարարեց վարչապետի աշխատակազմի ղեկավարին և առաջարկեց  ՀՀ նախագահի աշխատակազմի ղեկավարին, պետական վերահսկողական ծառայության պետին ու Սպորտի և երիտասարդության հարցերի նախարարին համատեղ ապահովել  շարժական գույքի հանձնման-ընդունման աշխատանքների կատարումը:

Նախագծով, մասնավորապես, առաջարկվում է ՀՀ վարչապետի աշխատակազմից ետ վերցնել և ՀՀ նախագահի աշխատակազմին ամրացնել 2 ավտոմեքենա, ՀՀ պետական վերահսկողական ծառայությանը՝ 2 ավտոմեքենա և ՀՀ սպորտի և երիտասարդության հարցերի նախարարությանը՝ 3 ավտոմեքենա: