391.07
Հայաստանի ուսումնական հաստատությունների դիպլոմները ճանաչելի են դառնալու Տաջիկստանում. Արայիկ Հարությունյանը ԱԺ-ում ներկայացրեց նոր նախագիծ
2 րոպեի ընթերցում
ԵՐԵՎԱՆ, 11 ՍԵՊՏԵՄԲԵՐԻ, ԱՐՄԵՆՊՐԵՍ: Օրենքի նոր նախագծով Հայաստանում և Տաջիկստանում ուսումնական հաստատությունների դիպլոմները փոխճանաչելի են դառնալու: «Արմենպրես»-ի հաղորդմամբ` «ՀՀ կառավարության և Տաջիկստանի կառավարության միջև կրթության որակավորումների, գիտական աստիճանների և գիտական կոչումների փոխճանաչելիության, համադրելիության մասին համաձայնագիրը վավերացնելու մասին» օրենքի նախագիծը ԱԺ-ում ներկայացրեց ՀՀ կրթության և գիտության նախարար Արայիկ Հարությունյանը:
«Դրանով ճանաչվում են կրթության բոլոր մակարդակների ավարտական վկայագրերը, դիպլոմները: Կողմերը գիտության և կրթության ոլորտում ակտիվ համագործակցելու նպատակով ստանձնում են մի շարք պարտավորություններ, փոխադարձաբար ճանաչում են հիմնական, միջնակարգ կրթության վկայագրերը, նախնական մասնագիտական և արհեստագործական կրթության մասին վկայագիրը և ներդիրը, ստացած կրթության ծավալը և բովանդակությունը արտացոլող ակադեմիական տեղեկանքը, բակալավրիատի և մագիստրատուրային դիպլոմները»,-ներկայացրեց Հարությունյանը:
Նրա կարծիքով` շատ կարևոր է Կենտրոնական Ասիայի պետությունների հետ առանձին փոխճանաչման համաձայնագրերի ստորագրումը: Դա թույլ է տալիս լուծել կառավարության առաջնահերթություններից` կրթության ոլորտում բարձրագույն կրթության միջազգայնացումը:
Ներկայում Հայաստանի բարձրագույն կրթության համակարգում սովորում է Տաջիկստանից ժամանած վեց ուսանող:
Պատգամավոր Տիգրան Ուրիխանյանը հետաքրքրվեց այլ պետությունների հետ շարունակաբար նման համաձայնագրեր կնքելու հեռանկարների մասին: Նախարարը նշեց, որ կոնկրետ ինֆորմացիա տրամադրել չի կարող, բայց աշխատանքներ կատարում են նաև այլ երկրների հետ:
Բաժանորդագրվեք մեր ալիքին Telegram-ում