ԵԽԽՎ հանձնաժողովը հավանություն է տվել անձնական տվյալների պաշտպանության կոնվենցիայում խիստ կարգավորումների առաջարկին
ԵՐԵՎԱՆ, 24 ՆՈՅԵՄԲԵՐԻ, ԱՐՄԵՆՊՐԵՍ: Եվրոպայի խորհրդի խորհրդարանական վեհաժողովի մշտական հանձնաժողովը դրական կարծիք է տվել Եվրոպայի խորհրդի նախարարների կոմիտեի առաջարկին, որը վերաբերում է անձնական տվյալների պաշտպանության կոնվենցիայի արձանագրությանն ու դրա բացատրական զեկույցի նախագծին:
Ինչպես հաղորդում է «Արմենպրես»-ը, այս մասին հայտում է ԵԽԽՎ-ում հայաստանյան պատվիրակության ղեկավար Արփինե Հովհաննիսյանը:
«Այսօր Կոպենհագենում՝ ԵԽԽՎ մշտական հանձնաժողովը դրական կարծիք տվեց ԵԽ նախարարների կոմիտեի առաջարկին, որը վերաբերում է «Անձնական տվյալների պաշտպանության կոնվենցիայի» արձանագրությանն ու դրա բացատրական զեկույցի նախագծին։ Առաջարկի հիմնական առանցքը առավել կոշտ կարգավորումների նախատեսումն է, որն առաջիկայում հանգեցնելու է անդամ պետություններում համապատասխան օրենսդրությունում փոփոխությունների կատարմանը, մասնավորապես՝ տվյալների մշակում չի կարող իրականացվել, եթե չկա անձի կողմից տրված հստակ համաձայնությունը, պարտավորեցնել տվյալներ մշակողներին գործել առավել թափանցիկ»,- «Ֆեյսբուք»-ի իր էջում գրել է Արփինե Հովհաննիսյանը:
Նա նաև հայտնել է, որ մինչ այս պահը գործող խորհրդատվական կոմիտեի փոխարեն առաջարկվում է ստեղծել Կոնվենցիոն կոմիտե՝ վերջինին հնարավորություն տալով գնահատել ներպետական օրենսդրությունում կիրառված միջոցների արդյունավետությունը և ներկայացնել առաջարկություններ:
Բաժանորդագրվեք մեր ալիքին Telegram-ում