ԵՐԵՎԱՆ, 25 ԱՊՐԻԼԻ, ԱՐՄԵՆՊՐԵՍ: Հայոց ցեղասպանության 102-րդ տարելիցը շարունակվեց նույն թափով, ինչ 100-րդ տարելիցի ժամանակ էր: «Արմենպրես»-ի հաղորդմամբ` ապրիլի 25-ին լրագրողների հետ հանդիպման ժամանակ այս մասին ասաց  ՀՅԴ Հայ դատի և քաղաքական հարցերի գրասենյակի ղեկավար Կիրո Մանոյանը: Նրա խոսքով` Թուրքիայի արձագանքը այս տարի, նախորդ տարիների համեմատ, բավականին քիչ էր:

«Միջազգային բոլոր լրատվամիջոցները խոսում են ցեղասպանության փաստի մասին և Թուրքիայի ժխտողական քաղաքականության վերաբերյալ, և այլևս չեն օգտագործում «հայերի տեսանկյուն» բառակապակցությունը: Բացի այդ Հայոց ցեղասպանության զոհերի հիշատակին նվիրված բոլոր միջոցառումներին  տարբեր երկրներում բավականին մեծ մասնակցություն ունեցան պետությունների կողմից գործադիր և օրենսդիր մարմինները»,- ընդգծեց Մանոյանը:

Անդրադառնալով Հայոց ցեղասպանության տարելիցի կապակցությամբ Դոնալդ Թրամփի ուղերձին` Մանոյանը նշեց, որ թեև Դոնալդ Թրամփը շարունակեց նախորդ նախագահների քաղաքական գիծը, սակայն իմանալով նրա անկանխատեսելի խառնվածքը չի կարելի այն ընդունել որպես վերջնական:

«Այս ուղերձը պետք չէ ընդունել որպես հիմնական ուղղություն: Հայոց ցեղասպանության հարցը կախված է, թե ինչ հարաբերություններ կունենա ԱՄՆ-ն Թուրքիայի, Ռուսաստանի և Իրանի հետ, քանզի ամերիկացիները այդ հարցը դիտարկում են ավելի մեծ խնդիրների համատեքստում»,- նշեց Մանոյանը: