Երևանում համերգային ծրագրով կնշեն չինական Նոր տարին
ԵՐԵՎԱՆ, 10 ՀՈՒՆՎԱՐԻ, ԱՐՄԵՆՊՐԵՍ: Չինական Նոր տարվա կապակցությամբ հունվարի 14-ին` Ա. Սպենդիարյանի անվան օպերայի և բալետի ազգային-ակադեմիական թատրոնում, տեղի կունենա Գանսյու նահանգի երգի-պարի անսամբլի «Մետաքսի ճանապարհ և ծաղիկների անձրև» խորագրով համերգը: Ինչպես «Արմենպրես»-ին տեղեկացրին ՀՀ մշակույթի նախարարության հասարակայնության հետ կապերի բաժնից, համերգն անցկացվելու է Հայաստանի Հանրապետության և Չինաստանի Ժողովրդական Հանրապետության մշակույթի նախարարությունների, ՀՀ-ում Չինաստանի դեսպանության աջակցությամբ:
Համերգը նվիրվում է Հայաստանի և Չինաստանի միջև դիվանագիտական հարաբերությունների հաստատման 25-ամյակին:
Գանսյու նահանգի երգի-պարի անսամբլը հիմնադրվել է 1961 թվականին: Անսամբլը ներկայացնում է Դունհուան քաղաքի արվեստը, սովորույթները և Մետաքսի ճանապարհի առանձնահատկությունները: Համերգային ծրագրի ընթացքում կներկայացվեն պարային ներկայացումներ, երաժշտական, գործիքային կատարումներ:
Բաժանորդագրվեք մեր ալիքին Telegram-ում