Ժամանակը Երևանում՝ 11:07:36,   28 Նոյեմբեր

Միհրան Հարությունյանը հույս ունի, որ մարզաշխարհն աչք չի փակի տեղի ունեցած անարդարության դեմ

Միհրան Հարությունյանը հույս ունի, որ մարզաշխարհն աչք չի փակի տեղի ունեցած անարդարության դեմ

ԵՐԵՎԱՆ, 22 ՕԳՈՍՏՈՍԻ, ԱՐՄԵՆՊՐԵՍ: «Ռիո-2016»-ում Հայաստանի օլիմպիական հավաքականի անդամ, Օլիմպիական խաղերի արծաթե մեդալակիր Միհրան Հարությունյանն անդրադարձել է իր շուրջ կատարվող իրադարձություններին: «Արմենպրես»-ը, վկայակոչելով Միհրան Հարությունյանի «В Контакте»-ի էջը, ներկայացնում է նրա խոսքերը.

«Չեմ հասկանում ինչից սկսել, բայց առաջինն, ինչ կուզեի ասել, դա  շնորհակալությունն է այն մարդկանց, որոնք չխուսափեցին «Ռիո-2016»-ի եզրափակչում իմ գոտեմարտի շուրջ կարծիք հայտնելուց: Շնորհակալ եմ ձեր ահռելի աջակցության համար: Ազգիս կողմից ահռելի աջակցություն եմ զգում: Յուրաքանչյուր պրոֆեսիոնալ մարզիկ երազում է բարձրանալ օլիմպիական պատվո պատվանդան և լսել իր երկրի օրհներգը. ես բացառություն չեմ:

Ողջ կյանքիս ընթացքում օլիմպիական բարձրունքի եմ ձգտել: Ես երազել եմ Օլիմպիական խաղերի ոսկե մեդալի համար պայքարելու հնարավորության մասին, և այդ երկար սպասված պահը եկավ: Ռիոյի ճանապարհին իմ նկատմամբ շատ անարդարություններ եղան: Որքան էլ ինձ համար ցավալի ու վիրավորական էր, համբերություն ունեցա, ոչինչ չձեռնարկեցի, որովհետև «Ռիո-2016»-ին սպասումով էի: Ու կրկին հրաշք տեղի չունեցավ, ինձ կրկին զրկեցին ոսկե մեդալից: Այդ արարքը հիասթափեցրեց ինձ, այդ պատճառով չէի կարողանում զսպել ինձ:

Մի՞թե մարզաշխարհն աչք կփակի այս հանցագործության վրա: Ոչ միայն ես. շատերներն են զրկվել մեդալից: Ես զրկվեցի օլիմպիական չեմպիոնի կոչումից, որովհետև ըմբշամարտի աշխարհում որոշում են Սերբիան, կամ այլ պետություններ: Բայց ես հպարտ եմ, որ հայ եմ:

Մենք փոքր, բայց մեծ ազգ ենք: Ցանկանում եմ նաև շնորհավորել իմ ընկերոջն՝Արթուր Ալեքսանյանին, ոսկե մեդալ նվաճելու կապակցությամբ: Նա արժանի էր այդ հաղթանակին: Շնորհավորում եմ ծանրորդներ Սիմոն Մարտիրոսյանին ու Գոռ Մինասյանին արծաթե մեդալներ նվաճելու առթիվ:

Պետք չէ վիրավորել սերբին. նա վատ ըմբիշ չէ, լավ էր պաշտպանվում:  Նա ամեն առավոտ հիշելու է իմ անունը: Ամեն անգամ իր ոսկե մեդալին նայելիս նա մտածելու է, որ այն իրականում ինձ է պատկանում»,- գրել է Միհրան Հարությունյանը:

 

 

 








youtube

Բոլոր նորությունները    


Գործակալության մասին

Հասցե՝ Հայաստան, 0002, Երեւան, Սարյան փող 22, Արմենպրես
Հեռ.՝ +374 11 539818
Էլ-փոստ՝ [email protected]