Հյուսիսկորեացի զինվորները հատել են Հարավային Կորեայի սահմանը, նրանց ուղղությամբ նախազգուշական կրակ են բացել
2 րոպեի ընթերցում
![Հյուսիսկորեացի զինվորները հատել են Հարավային Կորեայի սահմանը, նրանց ուղղությամբ նախազգուշական կրակ են բացել](http://armenpress.am/resized/480/static/news/b/2024/06/1139278.jpg)
ԵՐԵՎԱՆ, 11 ՀՈՒՆԻՍԻ, ԱՐՄԵՆՊՐԵՍ: Հարավային Կորեայի զինվորականները նախազգուշական կրակոցներ են արձակել այն բանից հետո, երբ Հյուսիսային Կորեայից մոտ 20 զինվոր կարճ ժամանակով հատել են երկու Կորեաների սահմանը։ «Արմենպրես»-ի փոխանցմամբ՝ այս մասին հաղորդում է հարավկորեական Yonhap լրատվական գործակալությունը։
Հարավային Կորեայի զինված ուժերի շտաբների պետերի միացյալ կոմիտեն հունիսի 11-ին հայտնել է, որ մի խումբ հյուսիսկորեացի զինվորներ հունիսի 9-ին, տեղական ժամանակով մոտավորապես 12:30-ին հատել են սահմանազատման գիծը սահմանի կենտրոնական հատվածում`երկու Կորեաները բաժանող ապառազմականացված գոտում։
Բարձրախոսով նախազգուշացումից և նախազգուշական կրակոցներից հետո հյուսիսկորեացի զինվորները վերադարձել են սահմանի իրենց կողմը։
Ըստ կոմիտեի խոսնակի՝ Հարավային Կորեան համարում է, որ զինվորները, որոնք ինչ-որ աշխատանքներ էին կատարում ապառազմականացված գոտում, միտումնավոր չեն հատել սահմանը։ Խոսնակը հավելել է, որ սահմանազատման գծում այժմ խիտ բուսականություն է աճում, և նշանները լավ չեն երևում։
Վերջին օրերին երկու Կորեաների միջև լարվածությունը սրվել է․ ի պատասխան հարավկորեացի ակտիվիստների կողմից քարոզչական թռուցիկների ուղարկման՝ Հյուսիսային Կորեան աղբով լի փուչիկներ է ուղարկել Հարավային Կորեա։ Սրան ի պատասխան՝ Հարավային Կորեան վերսկսել է սահմանին բարձրախոսով քարոզչական բնույթի հեռարձակումները վեց տարվա ընթացքում առաջին անգամ։