ԵՐԵՎԱՆ, 21 ՍԵՊՏԵՄԲԵՐԻ, ԱՐՄԵՆՊՐԵՍ։ Հայաստանի հատուկ հանձնարարություններով դեսպան Էդմոն Մարուքյանը հայտարարել է, որ առաջին հերթին Ռուսաստանից, ԱՄՆ-ից և Ֆրանսիայից է կախված՝ արդյոք ՄԱԿ-ի անվտանգության խորհրդում սեպտեմբերի 21-ին նախատեսված հրատապ նիստում կընդունվի բանաձև՝ ուղղված Լեռնային Ղարաբաղի ժողովրդի պաշտպանությանը։ «Արմենպրես»-ի փոխանցմամբ՝ այս մասին Մարուքյանը գրառում է կատարել X-ի իր միկրոբլոգում։

These people were forced to leave their homes and were evacuated by the Russian peacekeepers without any basic belongings. An urgent session is expected today at the UN Security Council. Will there be any resolution to protect these people, to restore their fundamental right to… pic.twitter.com/5O8cIg9IRe

— Edmon Marukyan (@edmarukyan) September 21, 2023

«Այս մարդիկ ստիպված են եղել լքել իրենց տները և տարհանվել են ռուս խաղաղապահների կողմից՝ առանց որևէ տարրական անհրաժեշտ պարագաների։ Այսօր ՄԱԿ-ի Անվտանգության խորհրդում հրատապ նիստ է սպասվում։ Արդյոք կլինի որևէ որոշում՝ այս մարդկանց պաշտպանելու, իրենց տներում ապրելու հիմնարար իրավունքը վերականգնելու, թե՞ ոչ։ Դա առաջին հերթին կախված է Ռուսաստանից, ԱՄՆ-ից, Ֆրանսիայից և ՄԱԿ-ի անվտանգության խորհրդի բոլոր մյուս անդամներից», - գրել է Մարուքյանը։

ՀՀ հատուկ հանձնարարություններով դեսպանը հիշեցրել է, որ ռուսական խաղաղապահները Լեռնային Ղարաբաղի տարբեր շրջաններից տարհանել են 5 հազար մարդու Ադրբեջանի ռազմական ագրեսիայի ընթացքում, որի նպատակն էր տարածաշրջանում էթնիկ զտումների իրականացումը։