ԵՐԵՎԱՆ, 3 ՄԱՐՏԻ, ԱՐՄԵՆՊՐԵՍ: Ադրբեջանի նախագահ Իլհամ Ալիևը հերթական կեղծ ու անհեթեթ հայտարարություններն է արել Մեծամորի ատոմային էլեկտրակայանի աշխատանքի վերաբերյալ՝ շարունակելով շրջանառել այն թեզը, թե Մեծամորի ատոմակայանը վտանգ է ներկայացնում ողջ տարածաշրջանի համար:

Ալիևը հայտարարել է, թե ատոմակայանն աշխատում է հին տեխնոլոգիաներով և ունի բազմաթիվ տեխնիկական խնդիրներ: Նա նաև մտահոգություն է հայտնել այն առնչությամբ, թե Հայաստանը իբր զբաղվում է միջուկային որոշ նյութերի ապօրինի վաճառքով, որոնք արտադրվում են Մեծամորի ատոմակայանում:

Ադրբեջանի նախագահն այս հայտարարություններն արել է Ատոմային էներգետիկայի միջազգային գործակալության  տնօրեն Ռաֆայել Մարիանո Գրոսիի հետ հանդիպման ժամանակ՝ մոռանալով, սակայն, որ ամիսներ առաջ Ռաֆայել Գրոսին Հայաստանում էր, այցելել էր Մեծամորի ատոմակայան, իսկ այցից հետո «Թվիթեր»-ի իր էջում կատարած գրառմամբ դրական էր գնահատել ատոմային էլեկտրակայանում կատարված անվտանգային բարեփոխումները:

«Հայաստանի տնտեսությունը հենված է Մեծամորի ատոմային էլեկտրակայանի վրա, և Ատոմային էներգետիկայի միջազգային գործակալությունը շարունակելու է իր աջակցությունն առաջարկել՝ օգնելու ատոմակայանին ցածր ածխածնային էներգիան մատակարարել ապահով և անվտանգ կերպով։ Ուրախ եմ տեսնել Մեծամորում արված անվտանգային բարեփոխումները, տպավորված եմ դրա նվիրված անձնակազմի հանձնառությամբ»,- «Թվիթեր»-ի իր էջում գրել էր Գրոսին:

Armenia's economy relies on Metsamor NPP, and @IAEAorg will continue to offer support, to help the plant provide low-carbon energy safely and securely. Pleased to see the safety and security improvements made to Metsamor and impressed with the commitment of its dedicated staff. pic.twitter.com/fSVKc3IThd

— Rafael MarianoGrossi (@rafaelmgrossi) October 4, 2022

«Արմենպրես»-ը հարցում կուղարկի Ատոմային էներգետիկայի միջազգային գործակալությանը՝ ևս մեկ անգամ հստակեցնելու կառույցի և դրա ղեկավարի դիրքորոշումը Մեծամորի ատոմակայանի անվտանգության վերաբերյալ: