Կոտայքի ոստիկանները թմրամիջոցի իրացման դեպք են բացահայտել. երկու անձ ձերբակալվել է

ԵՐԵՎԱՆ, 31 ՄԱՅԻՍԻ, ԱՐՄԵՆՊՐԵՍ: ՀՀ ոստիկանության Կոտայքի բաժնի քրեական հետախույզները, իրացնելով ապօրինի թմրաշրջանառության վերաբերյալ օպերատիվ տվյալները, մայիսի 26-ին Աբովյան քաղաքի Հատիսի փողոցում հայտնաբերել ու կասկածանքով բերման են ենթարկել Աբովյան քաղաքի 3-րդ Միկրոշրջանի 42 և 31 տարեկան երկու բնակչի։ «Արմենպրես»-ի հաղորդմամբ՝ ՀՀ ոստիկանությունը տեղեկացնում է, որ 42-ամյա տղամարդու անձնական խուզարկությամբ հայտնաբերվել է թղթե 7 փաթեթ, որոնցից 1-ը՝ մարիխուանայի, 6-ը՝ սպիտակ բյուրեղանման զանգվածով։ Ըստ տղամարդու՝ հայտնաբերվածը կանեփ և կրիստալ թմանյութեր են։ 31-ամյա տղամարդու խուզարկությամբ հայտնաբերվեց մոխրացած զանգվածով կաթուցիչ:

Փաստի առթիվ ոստիկանության Կոտայքի բաժնում հարուցվել է քրեական գործ։ Քրեական գործի շրջանակներում, դատարանի որոշմամբ, մայիսի 26-ին խուզարկություն է կատարվել Աբովյանի 42-ամյա տղամարդու ավտոտնակում։ Հայտնաբերվել են 4,5 մմ տրամաչափի ատրճանակ և 3 գրամից ավելի քաշով կանեփի սերմերով թղթե փաթեթ։ Հետագա միջոցառումներով պարզվել է, որ նա թմրանյութը գնել էր Աբովյանի 55-ամյա մի բնակչից։ Ճշտվել է իրացնողի ինքնությունն ու ձեռնարկվեցին միջոցառումներ՝ նրան հայտնաբերելու ուղղությամբ։

Ոստիկանության Կոտայքի մարզային վարչության ու Կոտայքի բաժնի ծառայողները 55-ամյա տղամարդուն հայտնաբերել են Աբովյան քաղաքի Երևանյան խճուղում և նրան ու ևս 2 անձի, իրենց «Օպել» մակնիշի ավտոմեքենայով, բերման են ենթարկել ոստիկանության բաժին։

55-ամյա տղամարդու անձնական խուզարկությամբ հայտնաբերվել է թղթե փաթեթ՝ սպիտակ բյուրեղանման զանգվածով, որն, ըստ նրա՝ կրիստալ թմրամիջոց էր։ Բերման ենթարկված մյուս տղամարդու խուզարկությամբ հայտնաբերվել է մոխրացած զանգվածով կաթուցիչ, որը, նախնական տվյալներով, նրան էր տվել 55-ամյա տղամարդը։

Բերման ենթարկվածներից 55 և 42 տարեկան տղամարդիկ ձերբակալվել են, ապա նրանցից մեկը կալանավորվել է։ Նախաքննությունը շարունակվում է: