Հասարակական

Շրջակա միջավայրի նախարարը ՄԱԶԾ մշտական ներկայացուցչի հետ քննարկել է շենքերի էներգաարդյունավետացման ծրագիրը

3 րոպեի ընթերցում

Շրջակա միջավայրի նախարարը ՄԱԶԾ մշտական ներկայացուցչի հետ քննարկել է շենքերի էներգաարդյունավետացման ծրագիրը

ԵՐԵՎԱՆ, 23 ԴԵԿՏԵՄԲԵՐԻ, ԱՐՄԵՆՊՐԵՍ: ՀՀ շրջակա միջավայրի նախարարությունում տեղի է ունեցել «Շենքերի էներգաարդյունավետ արդիականացմանն ուղղված ներդրումների ռիսկերի նվազեցում» ՄԱԿ-ի Զարգացման ծրագրի և Կլիմայի կանաչ հիմնադրամի (ՄԱԶԾ-ԿԿՀ) ծրագրի խորհրդի նիստը։

Ինչպես «Արմենպրես»-ին տեղեկացրին ՀՀ շրջակա միջավայրի նախարարության, նախքան նիստի մեկնարկը նախարար Հակոբ Սիմիդյանն առանձնազրույց է ունեցել Հայաստանում ՄԱԶԾ մշտական ներկայացուցիչ, խորհրդի համանախագահ Նաթիա Նացվլիշվիլիի հետ։

«Ողջունելով տիկին Նացվլիշվիլիին նախարարությունում, նախարարն ուրախությամբ փաստել է, որ մեր երկրի համար կարևորագույն այս ծրագրի ներկայացուցիչն առաջին գործընկերն է, ում հետ ինքը հանդիպում է նախարարի պաշտոնը ստանձնելուց հետո։

Հայաստանի Հանրապետությունում շենքերի ոլորտն էներգիայի ամենամեծ սպառողներից է։ ՄԱԿ-ի Կլիմայի փոփոխության մասին շրջանակային կոնվենցիայի (ԿՓՇԿ) ներքո Հայաստանի երրորդ ազգային հաղորդագրության համաձայն՝ շենքերի ոլորտը կլիմայի փոփոխության մեղմացման գերակա առաջնահերթություններից է»,- ասվում է հաղորդագրության մեջ։

«Կարծում եմ, որ իրականացվող ծրագիրը շատ կարևոր է ոչ միայն էներգիայի ռեսուրսների գրագետ և արդյունավետ կառավարման տեսանկյունից, այլև շահառուների շրջանում լուծում է սոցիալական որոշակի խնդիրներ։

Հաշվի առնելով այս և այլ բաղադրիչներ, ՀՀ կառավարության և Շրջակա միջավայրի նախարարության անունից պատրաստակամություն եմ հայտնել գործադրել հնարավոր ջանքերը՝ ծրագրի անխափան ընթացքի և շարունակականության ապահովման համար։

Վստահ եմ՝ ծրագրի հաջող ընթացքը համատեղ այլ ծրագրեր մշակելու և կյանքի կոչելու նոր խթան կհանդիսանա»,- նշել է նախարարը։

Ըստ աղբյուրի՝ Նաթիա Նացվլիշվիլին, շնորհակալություն հայտնելով հանդիպման համար, ևս մեկ անգամ վկայակոչել է այն ամուր հարաբերությունները, որոնք առկա են Շրջակա միջավայրի նախարարության և ՄԱԿ-ի Զարգացման ծրագրի միջև և նախանշել հետագա ավելի սերտ համագործակցության հեռանկարները։

«Էներգաարդյունավետության ծրագիրը ռազմավարական կարևորագույն ծրագրերից է նաև ՄԱԿ-ի Զարգացման ծրագրի համար և պետք է համատեղ ջանքերի ու ուշադրության ներքո լուծել բոլոր խնդիրները և առաջ շարժվել»,- նշել է Նաթիա Նացվլիշվիլին։

Վերահաստատելով ծրագրի ընթացքին օժանդակության պատրաստակամությունը՝ նախարար Հակոբ Սիմիդյանը հույս է հայտնել, որ շատ մոտ ապագայում հանդիպման օրակարգը կիրականացվի։

AREMNPRESS

Հայաստան, Երևան, 0001, Աբովյան 9

+374 10 539818
contact@armenpress.am
fbtelegramyoutubexinstagramtiktokdzenspotify

Ցանկացած նյութի ամբողջական կամ մասնակի վերարտադրման համար անհրաժեշտ է «Արմենպրես» լրատվական գործակալության գրավոր թույլտվությունը

© 2025 ARMENPRESS

Ստեղծվել է՝ MATEMAT-ում