«Լուսավոր Հայաստան»-ն առաջարկում է ընդլայնել ՌԴ-ի հետ անվտանգային համաձայնագիրը

ԵՐԵՎԱՆ, 23 ՄԱՅԻՍԻ, ԱՐՄԵՆՊՐԵՍ։ «Լուսավոր Հայաստան» կուսակցությունը Հայաստանի անվտանգության համակարգի արդիականացման և զինված ուժերի վերակազմակերպման նպատակով առաջարկում է վերանայել ռազմական դոկտրինան։ Ինչպես տեղեկացնում է «Արմենպրես»-ը, կուսակցության մայիսի 23-ին կայացած 3-րդ համագումարի ժամանակ այս մասին ասաց «Լուսավոր Հայաստան» կուսակցության կառավարման խորհրդի անդամ, Ազգային ժողովի պատգամավոր Գևորգ Գորգիսյանը՝ ներկայացնելով կուսակցության ծրագիրը։

«Արդիականացնել և վերազինել բանակը, ամրացնել և նորագույն տեխնոլոգիաներով կառուցապատել նոր ձևավորված պետական սահմանը, սահմանի պահպանումը ստանձնել միայն պրոֆեսիոնալ զինծառայողներով։ Թուրք-ադրբեջանական նոր սպառնալիքներին դիմակայելու նպատակով ընդլայնել Ռուսաստանի Դաշնության հետ անվտանգային համաձայնագիրը և Սյունիքում կազմակերպել նոր զորամիավորման ստեղծում»,- ընդգծեց Գորգիսյանը։

Երևանում մայիսի 23-ին մեկնարկել է «Լուսավոր Հայաստան» կուսակցության 3-րդ համագումարը։ Համագումարի առաջին հատվածում ելույթներով են հանդես գալիս «Լուսավոր Հայաստան» կուսակցության կառավարման խորհրդի անդամները, Ազգային ժողովի «Լուսավոր Հայաստան» կուսակցության պատգամավորները։