ԱԺ 7-րդ գումարման 4-րդ նստաշրջանում նախորդի համեմատ ընդունվել է 2 անգամ ավելի շատ օրենք
ԵՐԵՎԱՆ, 25 ՍԵՊՏԵՄԲԵՐԻ, ԱՐՄԵՆՊՐԵՍ: ՀՀ ազգային ժողովի 7-րդ գումարման 4-րդ նստաշրջանում «Իմ քայլը» խմբակցությունը 16 տոկոսով ավելի շատ օրենք է դրել շրջանառության մեջ, քան նախորդ նստաշրջանում:
«Արմենպրես»-ի հաղորդմամբ՝ «ԱԺ մոնիտորինգ» ծրագրի ղեկավար Լուսինե Վասիլյանը ներկայացնելով դիտարկման տվյալները այս մասին ասաց մամուլի ասուլիսի ժամանակ:
«Այս նստաշրջանում ԱԺ-ն հերթական հինգամսյա աշխատանքի երեք ամիսն անց է կացրել արտակարգ դրության պայմաններում։ Սա ֆորսմաժորային իրավիճակ էր, որն իր ազդեցությունն է թողել օրենսդրական գործընթացի վրա»,- նշեց Վասիլյանը։
Նրա խոսքով, ավելացել են ընդունված օրենքները. խորհրդարանը նախորդ նստաշրջանի համեմատ երկու անգամ ավելի շատ օրենք է ընդունել` 345-ը։ Ըստ բանախոսի, երկու անգամ ավելի արագ են ընդունվել ներկայացված օրենքների նախագծերը։ Ծրագրի ղեկավարն ընդգծեց, որ ընդունված օրենքների թվի կտրուկ աճը պայմանավորված է եղել նաև օբյեկտիվ պատճառով՝ արտակարգ դրությամբ։
Խոսելով Խորհրդարանում հեղինակած նախագծերի մասին, Վասիլյանը շեշտեց, որ ավելացել են մեծամասնության հեղինակածները:
«Ընդդիմադիրները ներկայացրել են 15 տոկոսով ավելի պակաս: Այս ցուցանիշները, թե՛ ընդունված օրինագծերի մասին են, թե շրջանառության մեջ դրված»,- նշեց ծրագրի ղեկավարը:
Նրա խոսքով՝ 21 նախագիծ, որոնք մերժվել են և օրակարգում չեն ընդգրկվել՝ համամասնորեն բաշխվել են «Լուսավոր Հայաստան» և «Բարգավաճ Հայաստան» խմբակցությունների միջև՝ 11:10 հարաբերակցությամբ:
Վասիլյանը հայտնեց, որ հիմնականում օրակարգում չեն ընդգրկվում և քննարկման հնարավորությունից զրկվում են ընդդիմության նախաձեռնությունները:
Լիլիթ Դեմուրյան
Բաժանորդագրվեք մեր ալիքին Telegram-ում