ԵՐԵՎԱՆ, 8 ՆՈՅԵՄԲԵՐԻ, ԱՐՄԵՆՊՐԵՍ: Հայաստանը կովկասյան տարածաշրջանում հայտնի է իր ձեւավորած ֆիլատելիստական հետաքրքիր ավանդույթներով, որոնք վերականգնելու եւ զարգացնելու ուղղությամբ մեր երկիրը ակտիվ աշխատանք է տանում: Սակայն, Հայաստանի ֆիլատելիստների միության նախագահ Հովիկ Մուսայելյանի խոսքով, Ադրբեջանն այսօր ակնհայտորեն մի շարք իրողություններ եւ փաստեր է կեղծում նամականիշների արտադրության մեջ:

«Եթե ասելիք չունես, բնական է, որ պետք է կեղծարարությամբ զբաղվես»,- Հայաստանի Հանրապետության անկախության 20-ամյակին եւ Երեւան քաղաքի օրվան նվիրված հանրապետական ֆիլատելիստական ցուցահանդեսի փակման արարողության ժամանակ նշեց նա: Նրա խոսքով' Ադրբեջանում վերջերս թողարկվել են բացահայտ կեղծ թեմաներով նամականիշներ' Կարսի պայմանագրի, ինչպես նաեւ Խոջալուում հայերի կողմից իրականացված «ցեղասպանության» մասին:

«Նրանք ամբողջ աշխարհով տարածում են կեղծ արժեքներ, մինչդեռ նամականիշները ազգային արժեք են, որոնք ներկայացնում են երկիրը, ժողովուրդը»,- իր դժգոհությունը հայտնելով' պարզաբանեց Մուսայելյանը:

Նա նաեւ հավելեց, որ ի տարբերություն Ադրբեջանի' Հայաստանում հատկապես խորհրդային տարիներին ֆիլատելիան մեծ զարգացում եւ տարածվածություն ուներ, իսկ նամականիշներն էլ բազմաժանր եւ բազմաբովանդակ էին: