«Լիվերպուլ»-ը և «Տոտենհեմ»-ը հաղթեցին. Չեմպիոնների լիգա
ԵՐԵՎԱՆ, 9 ԱՊՐԻԼԻ, ԱՐՄԵՆՊՐԵՍ: Ֆուտբոլի Չեմպիոնների լիգայում կայացան քառորդ եզրափակիչի առաջին հանդիպումները:
«Արմենպրես»-ի հաղորդմամբ՝ խաղային օրվա բոլոր հանդիպումներն անցկացվեցին Անգլիայում: Նախ՝ «Լիվերպուլ»-ն «Էնֆիլդ» մարզադաշտում ընդունեց «Պորտու»-ին: Անգլիական ակումբը խաղի 5-րդ րոպեին Կեյտայի գոլի շնորհիվ առաջ անցավ հաշվի մեջ, այնուհետև՝ 26-րդ րոպեին, Ֆիրմինյոն կրկնապատկեց հաշիվը: Երկրորդ կեսում թիմերից ոչ մեկին չհաջողվեց գոլ խփել, և «Լիվերպուլ»-ը հաղթեց «Պորտու»-ին 2:0 հաշվով:
Օրվա մյուս խաղում «Տոտենհեմ»-ը սեփական հարկի տակ ընդունել էր «Մանչեսթեր Սիթի»-ին: Երկու թիմերն առաջին կեսում մի քանի հնարավորություն ունեին առաջ անցելու հաշվի մեջ, բայց ապարդյուն: Նույնիսկ «Մանչեսթեր Սիթի»-ի հարձակվող Ագուերոն չիրացրեց 11-մետրանոց հարվածը: Երկրորդ կեսում «Մանչեսթեր Սիթի»-ն էր, որ հիմնականում տիրում էր գնդակին, սակայն գոլ խփեց «Տոտենհեմ»-ը: Խաղի 78-րդ րոպեին «Տոտենհեմ»-ից աչքի ընկավ Սոն:
Այս թիմերի պատասխան հանդիպումները կկայանան ապրիլի 17-ին:
Բաժանորդագրվեք մեր ալիքին Telegram-ում