Ադրբեջանում ձերբակալվել է ԱՄՆ-ից նոր վերադարձած իրավապաշտպան Էմին Ասլանը

ԵՐԵՎԱՆ, 5 ՀՈՒՆԻՍԻ, ԱՐՄԵՆՊՐԵՍ: Ադրբեջանական ոստիկանությունը հունիսի 4-ին անհայտ պատճառներով ձերբակալել է 3 օր առաջ ԱՄՆ-ից վերադարձած ադրբեջանցի իրավապաշտպան Էմին Ասլանին:

Այս մասին, ինչպես հաղորդում է «Արմենպրես»-ը, հայտնում է ադրբեջանական meydan.tv-ն:

Իրավապաշտպանի հարազատները գրավոր դիմում են ներկայացրել ոստիկանություն նրա ձերբակալության հանգամանքները ճշտելու նպատակով: Անհայտ է նաև, թե ոստիկանական, որ տեղամաս կամ բաժանմունք է տեղափոխվել Էմին Ասլանը:

Էմին Ասլանը 2014-ից բնակվում էր Վրաստանում: ԱՄՆ-ի Սիրակուզի համալսարան ընդունվելուց հետո նա տեղափոխվել էր Ամերիկայի Միացյալ Նահանգներ ուսանելու և Բաքու էր վերադարձել 3 օր առաջ: