Օջալանի փաստաբանները ցանկանում են տեսակցել իրենց պաշտպանյալի հետ
ԵՐԵՎԱՆ, 25 ՀՈԿՏԵՄԲԵՐԻ, ԱՐՄԵՆՊՐԵՍ: Թուրքիայի Քրդական բանվորական կուսակցության (PKK) առաջնորդ Աբդուլլահ Օջալանի փաստաբաններն իրենց պաշտպանյալին տեսնելու հարցով ևս մեկ անգամ դիմել են Բուրսայի հանրապետական դատախազություն: Ինչպես հաղորդում է «Արմենպրես»- ը, այս մասին տեղեկացնում է թուրքական Demokrathaber.net-ը:
Ակնկալվում է, որ ներկայացված դիմումին դատարանը կպատասխանի հոկտեմբերի 25-ի երեկոյան:
Թուրքիայում հուլիսի 15-ին ձախողված ռազմական հեղաշրջման փորձից հետո երկրում հայտարարված արտակարգ դրության պատճառաբանությամբ մերժվել է Օջալանի հետ հանդիպելու 49 դիմում:
Թուրքիայի քրդերի և երկրում ահաբեկչական համարվող Քրդական աշխատավորական կուսակցության (PKK) առաջնորդ Աբդուլլահ Օջալանը 1999 թվականի փետրվարին թուրքական հատուկ ծառայությունների կողմից բռնվել էր Քենիայի մայրաքաղաքում: Նա թուրքական դատարանի կողմից մեղավոր էր ճանաչվել պետական դավաճանության մեջ եւ նույն տարվա հունիսին դատապարտվել մահապատժի: Երկու տարի անց Թուրքիայում մահապատիժը չեղյալ էր հայտարարվել, եւ Օջալանի նկատմամբ կայացված դատավճիռը փոխարինվել էր ցմահ բանտարկությամբ: Օջալանն այդ պատիժը մինչ օրս կրում է Մարմարա ծովի Իմրալը կղզու բանտում:
Բաժանորդագրվեք մեր ալիքին Telegram-ում