Բունդեսթագի բանաձևը կրկնակի հարված էր թուրքական ժխտողականությանը. Շարմազանով
ԵՐԵՎԱՆ, 7 ՀՈՒՆԻՍԻ, ԱՐՄԵՆՊՐԵՍ: Գերմանիայի Բունդեսթագի կողմից Հայոց ցեղասպանությունը ճանաչող և դատապարտող բանաձևի ընդունումը լուրջ քայլ էր Ցեղասպանության միջազգային դատապարտման ուղղությամբ և կրկնակի հարված էր թուրքական ժխտողականությանը: Ազգային ժողովում հայտարարությունների ժամին այս մասին ասաց ԱԺ փոխնախագահ Էդուարդ Շարմազանովը:
«Քաղաքական ամառը մեկնարկեց պատմական իրադարձությամբ: Առաջին աշխարհամարտի տարիներին Օսմանյան Թուրքիայի երբեմնի դաշնակից Գերմանիայի խորհրդարանը ճանաչեց և դատապարտեց Հայոց ցեղասպանությունը: Դա լուրջ քայլ էր ցեղասպանության միջազգային դատապարտման ուղղությամբ և կրկնակի հարված թուրքական ժխտողականությանը: Ճանաչմանը հաջորդեց թուրքական հիստերիկ արձագանքը»,- «Արմենպրես»-ի հաղորդմամբ՝ նշեց Շարմազանովը:
Նրա խոսքով՝ Բունդեսթագի բանաձևին ոչ պակաս հիստերիկ էր նաև երկրորդ թուրքական պետության առաջնորդ Ալիև-Կրտսերի հոխորտանքը, երբ նա բանաձևը «կեղծիք և սադրանք» որակեց: «Ավելին, Ալիևը Բունդեսթագին մեղադրեց նաև անցած տարվա հուլիսին հակաադրբեջանական բանաձև ընդունելու հարցում՝ նեղսրտելով, թե Գերմանիան Ադրբեջանին համարում է ոչ ժողովրդավարական պետություն: Ինչպիսի զավեշտ՝ բռնապետը ժողովրդավարության դասեր է տալիս Բունդեսթագի պատգամավորներին»,- ասաց ԱԺ փոխնախագահը:
Բաժանորդագրվեք մեր ալիքին Telegram-ում